Тама демократия. басня

         
                1
 К|ват1 хьанавай ничхирар
 Гьам расуд,гьам рехиди.
 Демократидин жуьре
Хкязавай ч1ехиди.


 Гьунар авай,намус квай
 Гьайванар лап гъарик1 тир.
 Вакъиайрин тамавай
 Фендигар сик1 шерик тир.


 И сеферни ада вич
 Гьа сик1 тирди субутна,
 Тум гекъуьриз гьайванар
 Са-сад вичив агудна.


 Сес гудайбур къекъвена
 К1ват1на сик1ре хуьреркай
 Дустар кьуна уьмуьрлух
Туьк1уьн тавур къуьреркай.


 Дуду-кахна яргъалай
 Ада тамун вечрезни,
"Гьамиша ваз пай жеда"-
 Хиве кьуна тип1резни.


 Пехърез склад нисийрин
Къуллугъ касди гьазурна.
Чич1ер кьуна яргъалай
 Ламраз газар къалурна.


 Ихтилатар хкудна
Кабачарин кьилеркай,
Куьк тикеяр карагна
Жанавуррин вилеркай.


 Лавгъа сик1рен мецелай
Ширин гафар алахьна
 Чакъаларин сиверай
 Ц1аран ятар авахьна.


 Лагьана:-"за квадардач
 Куьне ч1угур зегьметар,
 Закай гьаким хьайила
 Хъийида квез гуьрметар ".


Пеленг кьулухъ амукьна ,
 Сик1рекай гьаким хьана.
Авур кардал фендигар
 К1евелай тагьким хьана.
 
                2
 Кеф-кефиятни девран
Сик1ре тама гьалзавай,
Гележегни фагьумна,
Вичиз девлет-малзавай.


Алцурариз тамун "халкь"
 Адаз регъуь жезвачир.
 Гафар авай зурбабур,
 Арадал кар къвезвачир.


Гъавурдик квай дестеди
Эхир сик1рез амална,
"Вун тамарин шагьин-шагь
Хьурай вири магьалда .


 Алай къуллугъ гъвеч1и я,
 Ам чакъалди авурай
Вун асландин чкадал
Чаз тахтунай акурай".

 Меркездизни гъил-гъиле
 Сек1ре хабар ракъурна,
Вилаятда къайда- гьал ,
Амачирди къалурна.


 Кьве гъилибан кьве къвалал
Алачухдиз гьахьна сик1.
Сас регъвейди асланди
 Вилаятдай катна сик1.


 Гьа ик1,дустар,фендигар
 Къуллугъдилай алатна.
 Бахт авачир "тамун халкь"
 Мад чакъалдал аватна.