Ватандикай хиялар

"Я яргъи жен хайи кlвач,
я жен ам куьруь",-
Лагьанва чаз бубайри
мисалра вири.
Хуьз тахьурай къакъара
гьич гапур къуьруь,
Макандикай жез тахьуй
чаз кьунвай кири.

Икl пайиз чил кьве патал-
фу тирни тlили?
Кьве патанбур хьанва чун
чилел чи багъри.
Гуя хайи чилерик
ккlанва зили,
Кьасабчидин вил ала
кlарабдал - сагъри.

Чил чувал туш тleкв авай
ягъиз са пине,
Чил парча туш къазунвай
дерзичид гъиле.
Яман жеда гьар халкьдиз,
квадрайтlа бине,
Гъурбатдикай ватан кьун
фидайд туш кьиле.

Кьибле пата лезгид гаф
физмач хьи ише,
Гьахъ рахайла къуватри
твазва вун кlеве.
Гьикьван жеда чун и къа,
къведан икl виже?
Жуван милли талукьвал
тазмач кьаз хиве.

Тариф туш зид кефердин,
гъавурда акьу(кь),
Кlусарзава хайи чил
жаллатlдин якlу.
Чи тияйри гузмач нур-
кьунва муьрхъ ракьу,
Вил ахъая, элдин хва,
де кьуд пад аку!

Кьулан вацlу багьа чил-
кьулалай хайи,
Атlанватla умудар
бубайри цайи?
Зи лезги халкь къул аваз
къулавай хьайи,
Лянет хьурай гьакимриз
чун и къал гъайи.

Каспи гьуьлуьхъ тадизва
Самурдин вацlу,
Лагь, вучда кьван авуна
гафаркай яцlу.
За жува жув негьзава,
я жед зун хаин -
Къул гадарна гъурбатда
хьанвай архайин.




   ( шиир гьеле куьтягьнавач)