Зи хайи хуьр багьа я заз виридлай,
Зи диде хьиз ам зи рик1из лап хуш я.
Хайи дагълар,дуьз дугунар цуьк алай,
Билбилрин сес ,михьи гьава заз нуш я.
Кагьраба хьиз дагъдин хурал алк1ана,
Акъвазнава Шейх Агьмадан нур алаз.
Къацу тарар михьи вац1ул алгъана,
Зи хайи хуьр акъвазнава дамах гваз.
А ви рушар пак намусдин гуьзелар,
Аквазва чаз ви нехишдай цуьквер хьиз,
Гадаяр ви - чи несилдин кьегьалар,
Дамах ийиз элкъвезва вал лекьер хьиз.
Агъсакъалар ви камаллу эгьлияр
Гьич шак авач ам ви кимин абур я
Акьул къачуз кимел къвезвай жегьилар
Ам чи хуьруьн пакад йикъан сабур я
Гельхенрин хуьр беглериз хас я лугьуз,
Ашукьарни хьанай тариф ийидай.
Зи халкь беглерив гекъиг жеда шаксуз,
Кьил виневаз, рик1 михьи яз къекъведай.
Къадимбег Ильясов
Зи хайи хуьр
© Copyright: Кадимбег Ильясов, 2016
Свидетельство о публикации №116033108093
Свидетельство о публикации №116033108093
Рецензии