Куруни авайди т1уруни къачуда

 тахсирдач за,хайи ч1ал течир аялдин,
 Курунивайди гьам т1уруни къачуда.
 Тахсирда за адан дидинни бубадин,
 Урус ч1алал рахазвай хзандин арада.

 Дидени буба жуван ч1алал рахайт1а,
 Са шак авач аялди и кар кьат1уда.
 Гузвай тербия лезги ч1алал гайит1а,
 Лезгидин бала лезги ч1алал рахада.

 Лезги махарни к1ела жуван балайриз,
 Къуй абруз лезги къагьриманар чир хьурай.
 Лезги лай-лайдал ракъур ая ахвариз,
 Лезги баладиз ширин ахвар атурай.

 Жуван веледриз чира лезги тарихни,
 Къуй веледризни чи игитвал чир хьурай.
 Чи къагьриманрин игитвални къилихни,
 Абрун виждандикни  ивидик кваз хьурай.

 Са шумуд женгина гъалиб хьай лезги ч1ал,
 са шумуд шаир, ашукь гъетерив  хкажай.
 Ихьтин ч1ал гьик1 эцигда лагь къе чилерал,
 Къизгъин дявейра чи душмандив акъажай. 

 Жуван хайи ч1ал са ч1алахъни дегишмир,
 Хайи диде хьиз вуна ви ч1ал яхъ вине.
 Лезги -лезгидив урус ч1алал рахумир,
 Хъуьреда квел, къачумир куьне-квез тегьне.

  Къадимбег Ильясов