Дагъ рик1 ят1а-вац1 дамар я чи чилин,
Кьуват гузвай сагъламвилиз чилерин.
Дуьз кар туш иви пай авун са рик1ин,
Жув магьрум яз гъейрибуруз пай ктун.
Самур вац1ни гьа и жуьре хьанава,
Чаз бес тежез гъейрибуруз пайнава.
И гьал акваз вучиз чи халкь канава?
Гьакимарин къаст яни чак ц1ай ктун?
Чил пайнава,халкь пайнава кьве патал,
Багъри -багъридивай авунва яргъал.
Сергьятни хьанва чаз-живедин маргъал.
Дуьзвал яни ик1 чи рик1ик къай ктун?
Вучиз лезги халкьдин рик1е тунва т1ал?
Чи хайи чил вучиз къе чаз хьанва сал?
И дерт ч1угваз ч1уру я чи халкьдин гьал,
Дуьз яни бес чи руьгьдик гьарай ктун?
Кадимбег Ильясов
Руьгьдин гьарай
© Copyright: Кадимбег Ильясов, 2016
Свидетельство о публикации №116033107944
Свидетельство о публикации №116033107944
Рецензии