Чаз яран сувар къвезава

 Мукьва жезва яран сувар
Т1ебиатдал чан къвезава.
Чин умудрик кутаз лувар
Гатфар чаз мугьман жезава.

Гзаф жезва чими йикъар
Ц1разава живер,мурк1ар.
Артух жезва вац1а ятар
Селдихъ галаз къван къвезава.

Яраз яру жеда рагъни
Михьи жеда цавун тагъни.
Къацу жеда Шалбуз дагъни
Билбилрин хуш ван къвезава.

Ламу накьварин арадай
Акъатда цуьквер чиладай.
Къаварни ,дак1ар гатадай
Марфни ц1айлапан къвезава.

Акъудда гьар гьенел шемер
Шад жеда ,чин вири эллер.
Куьк1уьриз к1валера эквер
Ч1ехи гъуц ,,АЛПАН,, къвезава.

К1ват1 жеда рушар гадаяр
Хкадардай,хъийиз ц1аяр.
Кьулухъ тваз,цив ац1ай  вац1ар
Чуьнгуьр гваз мазан къвезава.

Кьуьлер ийиз ,элкъвез чун ц1ал
Илигда лезги манийрал
Звал гъизавай чин ивийрал
Цуькверин девран къвезава.

Куьк1уьрайла яран ц1аяр
Амукьдач чаз хъуьт1уьн къаяр.
Чин чилерал пайиз бахтар
Т1арлацни-Арчан къвезава.

Ша чун фин шииррин ник1ел
Мад килигин к1ват1из эч1ел.
Къелем кьурла ,тадиз рик1ел
Ст1ал- Сулейман къвезава.

 Шиир  Т1игьиржалви Юсиф Халиловахъ  галаз   интернетда  сада-садаз гайи жавабрин  бинедаллаз арадиз атайди я.
Са паюнин автори гьам я.