Сик1ни жанавур

      (Басня).

Жанавурди лагьана заз:
"Килигайт!а вун зи ч!алаз,
Жуван багъри шараг хьтин,
Вердишарда за захъ галаз".

Хиве кьуна заз девлетар,
Т!уьнар-хъунар, гьак! лезетар,
"Махоркани ч!угвамир мад-
Фильтер галай сигаретар".

Гьассятда зун хъуьтуьл хьана,
Акьулдизни кьезил хьана.
А вагьшидин мез акурла,
Акваз-акваз гъафил хьана.

Хьана вичихъ галаз тухуз,
Чуьнуьхардай рекьер къалуз.
Куьк тикеяр меме-кьурт!из,
Зав алажай ц!умар вугуз.

Акуна заз къе са шумуд,
Жанавурди ийизвай суд...
И зун хьтин кьуд к!вач квайбур
Алажзавай йифе са цlуд.

Зани кьурла як са бубат,
Къведачирни бес зал нубат.
Стхани кваз тир нез гьазур,
Тух тежедай тир ам са затl.

Авурт!ани ада къелет,
Игьтиятвал хуьн яз,гьелбет.
Ч!арарикай,таквадайвал,
Алук!на за бронежилет.

"Адахъ галаз саддач за ч!ал,
Атайт!ани уьмуьр кашал",-
За вахтунда авуна гьисс
Зиди адав гвайди ажал.

Кьил недалди, вахтундамаз,
Зун адавай хьана яргъаз.
Вагьшидивай къвез тежедай,
Ц!егьер авай,катна рагаз.

Зун къекъвезва адан геле,
Эцигдайвал кьадай желе.
Беябурна халкьдин вилик,
Акьадайвал пеле гуьлле.

Герек туш заз адан хамни,
Киц!ери къазунрай гьамни.
Гьар вагьшиди аннамишна,
Чухвадайвал вичин кьамни.