Хиялар, мурадар чи чIалал я зи!

Экуьнен кьилер я. Югъ ахъа жезва,
ДакIардин а патай Париж аквазва,
«Monamour.Jet'aime» - «Заз вун канзава!»-
Эхь, им Франса я -ашкъи ргазва!
 
Югъ икI авалзава италяндини,
«Ихтилат ийизва» гъилери цава,
Лугьузва гьа  рушаз са вуч ятIани,
Эхирдай  «tiamo» - «Заз вун канзава!»
 
Низ чизвач «I love you», фад-фад къвезва ван,
Чаз хайи туштIани, аку миливал!
Дуьз я, ади хьанва чаз  мана адан,
Амма гьар са руьгьдиз  гузва чимивал.
 
« Люблю!» - лагьана чIехи  Пушкина,
Чилериз, инсанриз  вичин ватандин.
Кани тир канабдин ник Есениназ,
Ашукь тир таватрал ам Рязандин…
 
Эхь, дуьнядин пунар тушни канивал?!
Гьар халкьдиз вичиз хас ашкъ  чирун ава!               
Амма виридалай  заз хайи чIалал,
Муьква я, масан я «Заз вун канзава!»-
 
Легьзеда верцIивал квахьда «amour»дин,
Лондонда «I love you» кьада цифери.
Ван гьатда япара хайи Самурдин,
Кушкушда – «Канзава!» саки лифери.
 
Яйлахра балкIанрин, миргерин ванер…
Лекьери кьуьлзава ашкъидив цава…
Зи кьакьан Шагь суван жив алай хивер
Саки лугьуз ава: «Заз вун канзава!»

 Гьар са гаф иер я дидедин чIалал!
Эй кьисмет, зун валай гьикьван я рази-
Сифте яз и чIалал кьатIай канивал,
Хиялар, мурадар и чIалал я зи!