пуд къавах

ПУД  КЪАВАХ

ВацIун тиредал пуд къавах ала,
Махарик квай хьтин пуд пагьливан.
ТIебиатди ганвай гуж, къуват гала:
Гуьркемдиз зурба ва гьакIни кьакьан.
Тиредин кIаняй лап игис хьана,
Кьалу каф алаз.авахьзава яд.
Къавахрин дувулар ава экъис хьана, -
Аватнава тиредилай накьвадин къаяб.
Шумуд йикъар тир, чIулав цифери,
АлтIушна кьунваз синерни дагълар.
Серфе гьатнавай марфади, куьчери,
Са къатда кьурнай хар галаз юргъвар.
Гужлу сел гьатнай вацIун шакъайра,
Хурук кткайди муьтIуьгъарун кьетIна.
Шакъаярни кваз гуьтIуь яз гьисабна,
Кьерен чилерни тухуз эгечIна.
Амма жуьретнач къавахар тухун,
Гьиссна, дувулар тирди мягькемди.-
Чилин ирид къатунун алакъада хьун,
Къалурна селдиз, пайгар гуьркемри.
Ингье, ахъа я цавар, михьи я гьава.
Ракъинин нурарик гуьлуьшан я алем…
Амма вацIун ранг рагъул яз ама…
Амукьаяр селдин аквазма гьелен.
Кьезил шагьвардин пешери вишриш
Ийиз, къавахрин суйни я секин.
Женгинин либас авуна дегиш,
Адетдин уьмуьр тухузва чпин…