Ругьдин чешме канивилин булах я,
Зи дуьнядин экуьвал я муьгьуьббат.
Туба ийиз, элкъвез-хуьквез ч1алахъ я,
Зи гьиссерин михьивал я муьгьуьббат.
Лезет ац1ай легьзе ава, гьал ава,
Азаб ава, татаб ава, т1ал ава.
Гьуьл кьван ч1ехи, и рик1 лугьур к1вал ава
Зи кьат1унрин хцивал я муьгьуьббат.
И дуьняда цавариз хас нур ава,
Нехиш ава, ц1илихъ ава, фур ава.
Гафунин чим, гьиссерин ц1ай гур ава
Зи фагьумдин ч1ехивал я муьгьуьббат.
Зи алемдиз экв гуз авай сад ава,
Гатфар ава, кьуьдни, зулни гад ава.
Шиир лугьур руьгь ргазвай яд ава,
И ч1арарин рехивал я муьгьуьббат.
Муьгьуьббат
© Copyright: Эйваз Гуьлалийрин, 2016
Свидетельство о публикации №116022011962
Свидетельство о публикации №116022011962
Рецензии