Кьулан вацl

Агь, зи Самур - чи рикl алай вацl Кьулан,
Хьанва вакай элдиз залан пар кlулан.
Гьикьван гагьди са халкь жеда кьве патан,
Туширни вун хайи чилин тар -  кьулан?

Ни хана вун, гьи кьасабчид акlажна,
Вуж гатlунна вичин кьве гъил къакъажна?
Гьи жаллатlди вун кlанивал акъажна,
Кабабна вун, лап шишинал акьалжна?

Къал-макъалдин цилер цана  багъманри-
Къени халкьдиз зиян гайи душманри:
Залум сергьят ви кьер тирвал туькlуьрна-
Бинедбурун бахтунин гъед туьхуьрна.

"Чlурубуруз", "халисбуруз" пай хьана,
Садбур ава ахмакьбурун тай хьана.
"И патанда" "а патандаз" къехуьниз-
Лайих яни хайи чилел къекъуьниз?

Белки, зи вацl, вунани лап цlурзава,
Амма вучиз элдин сагъвал чlурзава?
Рикleра вун акъат тийир тlал жемир,
Вах стхадвай къакъудзавай цал жемир!

Алпан гъуцран вилик чун тахсир ятlа,
Са халкь паюн Чlехи Гъуцран сир ятlа?
Кьисас ятlа Цавари чаз авурди,
Жаза ятla чи вилериз акурди?

Инлай-анлай шивералла пурар чи,
Гаф сад тушиз къакъарава турар чи.
Са югъ къведа - ви рагъул яд алцифда,
Лезгияр вал, Кябедал хьиз, илифда!


 Шикил интернетдай