Михьивилин чешне
Къацу либас алук1навай
Т1ебиатди бухахдал.
Зи шаир рик1 хиялдавай
Са дереда булахдал.
И булахдин верци ванци
Пара яман къуна зун.
Хайи чилин иервили
Пагь ат1ана туна зун.
Агъуз хьана, са хуп1 хъвана
Темен гана чешмедиз.
Инал булах акуна заз
Михьивилин чешне хьиз.
Хайи чиляй акъатзавай
И булахдин ст1алри.
Илгьам гана ифирна рик1 –
Лув гана зи хиялри.
И дередин берекатди
Ашкъи туна зи рик1е
Акуна заз гуьзелвални
Зи ватандин гьар пип1е.
Ашукь хьана ч1ехи Шагьдин
Чалма алай кьилел зун.
Ашукь хьана Чпир хуьрел
Зи кьеб хьайи челел зун.
К1ан хьана заз, фирай уьмуьр
Михьиз, дуруз – булах хьиз.
К1ан хьана заз яшамиш жез
Хайи чилин дамах хьиз.
© Copyright: Эйваз Гуьлалийрин, 2016
Свидетельство о публикации №116021706115
Свидетельство о публикации №116021706115
Рецензии