Купул булах
Гьар атайла и дерейриз
Квахьда гъам - фикир.
Гьар са пип1е, гьар са пурча
Хъуьрезвай шиир.
Кьвалар къакъан, рукар къалин
Булахар пара.
Хъиткьинда рик1, и дерейра
Акъваздач хура.
Вил к1ак1 тийиз, амукьна зун
П1узарар жакьваз.
Байихнай за аватай хьиз
Женнетдин юкьваз
Авахьна физ къайи ятар
Дереяр къуна.
Нур гуз ава купул булах
Булахрин суна.
И булахдин кьезил ятар
Дердериз чара.
И камара шаир тахьун
Гунагь я пара.
Агаж хьайи шумуд инсан
Къекъуьник ц1игел.
Себеб хьана купул булах
Къарагъна к1вачел.
И булахдал са чаяр хъун
Хуш жеда рик1из.
Атай ч1авуз Купул п1ирел
К1ан жедач хъифиз.
Агъзур цуьквед атир жеда
Агъзур къушран ван.
Вуч хъсан я, к1ани дустар
Гуьзел я Ватан.
© Copyright: Эйваз Гуьлалийрин, 2016
Свидетельство о публикации №116021706107
Свидетельство о публикации №116021706107
Рецензии