Шердикай хуьх
-
Алахъдач зун шеле к1ват1из
И дуьнядин епинал.
Алахъдач зун гъуд элягъиз
Заманадин рипинал.
-
Ният авач заз уьмуьрдин
Къулпуникай галк1удай.
Ялтахвална, кьве къат хьана
Пине хьана алк1удай.
-
Я ахварни к1анзавач заз
Хайи чилиз кьеб лугьуз.
Кьил агъузна акъваздач зун
Акатайда хеб лугьуз.
-
Ракъини хьиз экв гуз к1анда
Чим гуз к1анда рик1ериз.
Тек шердикай кич1еда заз
Татурай чи рекъериз.
-
Михьи т1варцив уьмуьр ракъун
Пара четин к1валах я.
Аллагь, на чун шердикай хуьх
Ви къудратдин ч1алахъ я.
© Copyright: Эйваз Гуьлалийрин, 2016
Свидетельство о публикации №116021609678
Свидетельство о публикации №116021609678
Рецензии