Шиир вуч я?

               
-
Чк1анва  гьар  патаз
Шиирдин  азар.
Бес  вучиз  ужуз  я
Гафунин  базар?
-
Чарчиз  регъуь  жезва
Ц1араркай  зурак1.
Шиир  ихтилат  туш
Рахазвай  хьрак.
-
Аллагьди, шаирди
К1елдайди  галаз,
Пуд  т1емди  арадал
Гъун герек аваз.
-
Руьгьдикай  куьз  хьайи
Пагь ат1удай ван.
Шиир  хайи  чил  я,
Шиир  и  ватан.
-
Рагарин  юкьварай
Ат1уз  авай  рехъ.
Йисарин  далдадай
Туьхъун  тийир экв.

Къадакьри  къан  тийир
Байихрин  гьарай.
Шиир  са  шаирдин
Квахьнавай  кьарай.

Акьазвай  къуша  т1уб
Лигим  хьайи  хам.
За  элкъвей-къекъвейра
Вегьенвачир  кам.

Шиир  шейт1андикай
Хкудзавай  хъел.
Фасикьдин  бебекдал
Туькуьрнавай  хьел.
-
               

                Шиир шиир тушт1а
К1елуниз гьайиф.
Герек туш ялтахвал
Нагьахъан тариф.

Эгер са ц1ийи гаф
Авачт1а кьиле.
Къелем шиир кхьиз
 Къаз тахьуй гъиле.

И ц1арар кеспи ваъ
Звал я зи рик1ин.
Шиирдиз мугьман туш,
К1вал я зи рик1ин.