Уьмуьр гьала итим хьиз

-
Гьахъсузвилер  акурла
Пис  гьалара  гьатда  зун.
Мез  са  жуьр, кар са  жуьр
Инсанрикай  катда  зун.

Таб  рахайла  ч1ехиди,
Къудур  ч1авуз  пехъиди,
Пиян  хьайла  рехиди
                Хъиткьин  хьана  гватда  зун,
Пис  гьалара  гьатда   зун.

Ч1улав  лугьуз  лацудаз
Жез  авачт1а  вучин  за?
Зи  дуьшуьшдиз   дуьз  ксар
Къвез  авачт1а  вучин  за?

Лугьуда  заз  дустари.
Рик1ин  михьи  къастарив:
-Са к1ус  фу  неъ  шукур  гъиз
На   жув  к1еве  твада  гьа!!!
Я  тахьайт1а  аку  ви.
Келле  меци  хада  гьа!!!

Эцигна  бармак  вилик:-
-Белки  зун  бат1ул  ят1а?
Девирдик   кваз  кам  вигьиз
Тахьун  ч1уру  т1ул  ят1а?

Шумуд  сефер   эхна за,
Дуьнья  тамам  негьна  за.
Садавни  гьич  эгеч1нач,
Кимерални  экъеч1нач.
Жува-жуваз  цайиди
Жува-жуваз  нез  хьана.
Вуч  авурт1ан  дуьшуьшдиз
Мердимазар  къвез  хьана.
Акъвазна  зи  вил-виле,
Алцурариз  гъил  гъиле,
Тарашиз  к1анз  жибин  зи
Хкажзава  ифин  зи.

Ч1агурна  кьам  к1екре  хьиз,
Эхтилатиз  пехъре  хьиз.
Авурт1а  на  кьил  агъуз,
Ацада  вун  хеб  лугьуз.
Жавабгайт1а  дак1вада,
Сик1ре  фасун  рахада.
Ширишариз  т1вар  михьи
Ширейрани  твада  вун.
Экъисна  к1ир, къада  вун,
Пагь  ат1ана  тада  вун.
Ялтахвализ  алакьдач.
Эхиз  жедай  хам  авач,
Садрани  гьарам  хьанач.
Жагъайт1а  са  вад   манат
«Гьиданди  я?» лугьуда.
Дустар, куьнен  гьалалвал
Куь  рик1ерив  агуда.
Вине  авай  ахъа  пел
Гужна  агъуз  къаз   тахьуй.
Чин  авачир  ламат1ар
Мукьварални  таз  тахьуй.
Садаз  к1ек  хьиз  къалуриз,
Санал  къвазмир  етим  хьиз.
Къаргъиш – къехуьн  галачир
Уьмуьр  гьала  итим  хьиз.