Жезва зун

Ж Е З В А   З У Н

Дарих хьайла хъфизва зун Киригиз.
Рик1 аладриз хайи чилиз килигиз.
Шад суфрайрал ихтилатрал илигиз,
Ара-ара  мугьманвиле жезва зун.

Хъфин патал жув улакьра эцягъиз, -
Гагь ракьун рехъ, гагьни шегьре хкягъиз.
Гьим къулай я, гьим къулай туш кьеч1ягъиз,
Регьят рекъик тамарзу яз жезва зун.

Рекье авайла часпар гьатиз рик1е зи,
Адалатсуз кьве пайнавай диге зи.
Туькьуьл накъвад кьаз кьве вилин нине зи,
Рекьин мензил куьруь ийиз жезва зун.

Дигед юкьвал часпархана къуша я,
Махлукъатни жергедаваз нупа я,
Акъваздалди чан бизарда -суза я,
Жуван чилел чаради яз жезва зун.

Фагьумайла ам чи чилиз рехне я.
На нукьсан лагь, жавабни ваз тегьне я.
Эляч1ун вич, сирнав герек дегьне я.
Сая тушиз хуп1 азабда жезва зун.

Гьар гъилера чи гьалдикай фикириз,
Алагъ-салагъ авайвиляй шукуриз.
Чун пай хьунал гьайиф ч1угваз, рик1 ифиз,
И рекьерин фин-хтунра жезва зун.

Шаир Фикрет, чи т1ал-квалдиз хас вуна,
Ажеб ч1алар туьк1уьрзава гагь вуна,
Сажда ийиз Халикьдизни лагь вуна:
Ватан патал хифет ч1угваз шезва зун.

2004 й.