Гафэлкъуьрин-2

ЭЙВАЗ
 
Гьатнавани вун ашкъидин дегьне ахвара,
Ак1анвани муьгьуьбатдин верц1и махара?
Сунайривай мелгьам кан тир, шаир фугъара
Илис хьана ая жуван, кар т1имил-т1имил.
 
 
 
Шахмардан- III


Чанда шагьвар къугъвазва са, гуьзел сунадин
Акьадамаз адан чина гар т1имил-т1имил.
Алугзава ц1ай кьуна шал лацу жунадин,
Алахьдамаз вилерилай зар т1имил-т1имил.
 
Эйваз
 
Мад сунайрин, гелер вуна кьеч1езва пара,
Яш финивай, таватривай кан жезва чара.
К1вале ава, ви Рагъ, ви Варз къекъвемир пара
Акьада ви кьиле шаир, хар т1имил-т1имил.
 
 ШАГЬМАРДАН
 
Хуьруьн са пад рагъ элцифай кьакьан тирин тир,
Накьанан югъ къениндилай гзаф серин тир,
Ярдин багъда яру п1ини вирт хьиз ширин тир,
Вучиз,дуьня жезва рик1из дар т1имил-т1имил?
 
 
ЭЙВАЗ
 
 
Гьик1 ялзава, гъвеч1и танда икьван ч1ехи гъам?
Аквазва заз шуп1зава вун, гьижранди тамам,
Фад дигишра и легьзеда, "ашкъидин макьам"
Кьаз хьурай на а гуьзелрин, т1вар т1имил-т1имил.
 
 ШАГЬМАРДАН
 
Са легьзеда верци макьам къведа мецел зи,
Лугьуз жедач, ивидин сел ала херел зи,
Яраб,гъамар кхьенват1а анжах пелел зи,
Акьазва за заманадин к1ар т1имил-т1имил.
 
 ЭЙВАЗ
 
Гаф ава заз чи "Марвардин" ч1ехи дамахдиз,
И межлисдин Шагь шаирдиз, кани даяхдиз:-
Вун шаир я, авахьзавай дагъдин булах хьиз,
Амма яла, заманадин пар т1имил-т1имил.
Кхьиз тахьуй, вуна мирес ц1ар т1имил-т1имил.
 
 

ШАГЬМАРДАН
 
"Марвар"- гатфар, "Марвар" - шагьвар, булах я.
Ам чи халкьдин къенивилин дамах я,
Пакам йикъан экверал зун ч1алах я,
Кутан чна гьар ц1верек1дик т1вар т1имил-т1имил.
Шииратдин т1инидикни гъвар т1имил-т1имил.
 2