Варз алай йиферин эквер я заз хуш,
Куь патав атайла куь хъвер я заз хуш,
Куьн-квез несиб жедай мехъер я заз хуш
Я чан лезги гада, я чан лезги руш.
Ашкъидин бахтунай агакьнава гъил,
Гьатнава ахъаймир пад хьайит1ан чил.
Яр квачиз рик1 сефил, и алем сефил
Ашкъи рик1иягъун, ашкъи рик1из хуш
Я чан лезги гада, я чан лезги руш.
Бахтунин къенивал кхьин хьуй пеле,
Ашкъиди рик1ера хкажрай к1еле.
Куьн кани жуьт хьурай Аллагьдин виле
Я чан лекьрен шараг, я чан т1авус къуш,
Я чан лезги гада, я чан лезги руш.
Рик1-рик1из даях хьуй, мез-мециз пайгар,
Кьезил хьуй гьар са кам, хъуьрена шагьвар.
Ахъайна Эйваза шиирдин дафтар
Гьисабда алхишар, уьмуьр хьурай нуш
Я чан лезги гада, я чан лезги руш.
Чамразни свасаз
© Copyright: Эйваз Гуьлалийрин, 2016
Свидетельство о публикации №116021412126
Свидетельство о публикации №116021412126
Рецензии