Ви гаф ц1арц1ув, ат1ун стха яб це заз,
Алакьдат1а, дурум це заз, таб це заз.
Зи кьат1унрин миже кьадай къаб це заз.
Чк1ай рик1е сабурдин т1вар цада за,
И дуьнядин тилисимар хада за.
Гьахъ лугьудач, акваз авай ч1урудаз,
Пак лугьудач рик1 мецелай цурудаз.
Ракь лугьудач, хъуьм кьунавай «хару»даз
Таб рахайт1а мез п1узардал цвада за,
И дуьнядин тилисимар хада за.
Сад кула къаз, садан кьамал акъахдач,
Чешме туна, турбад виляй авахьдач.
Гьалал туна, зун гьарам акахьдач
Гьа и жуьре, уьмуьр рекъе твада за,
И дуьнядин тилисимар хада за.
Яшдин к1валах къаkурайт1ан ч1арари,
Вилин к1ак1ар къуруз хуьзва гарари.
Ара-ара гатайт1ани харари,
Гафунин гъил ахъай тийиз къада за,
И дуьнядин тилисимар хада за.
Тилисимар хада за
© Copyright: Эйваз Гуьлалийрин, 2016
Свидетельство о публикации №116021107511
Свидетельство о публикации №116021107511
Рецензии