ЦIийи лезгияр

                ( мани )
Амачиз виле куьгьне дехмеяр.
Эцигзавай къе зурба къелеяр,
Кирида кьуна устIар, фялеяр.
ЦIийи рекьерай фейи лезгияр,
ЦIийи лезгияр ,ц|ийи лезгияр

Экъисна вилик хурудин кьефес,
Азадвилелди къачузвай нефес,
Агалкьунри квек кутунва гьевес.
Умуьрди бахтар гъайи лезгияр,
ЦIийи лезгияр, цIийи лезгияр.

Кьисметдин меркез хьанвайла базар,
Ише хъфизмач бажарагъни т|вар.
Амачиз кIвалах, хьанвай чеб бейкар,
Фикирда хьуй куь кайи лезгияр.
ЦIийи лезгияр,цIийи лезгияр.

Артух жердавай хазине-девлет,
Къалин хьурай куь хатурни гьуьрмет
Рик|елай фимир куь Ватан-миллет,
Я эхир хайир хьайи лезгияр ,
ЦIийи лезгияр, цIийи лезгияр.

<<Джипар>>  чилел,гимияр гьуьлел,
Рагъни хъуьрезва цава куь кьилел.
Садакьа- игьсан алаз хьуй гъилел,
Я сад Аллагьди гайи лезгияр,
ЦIийи лезгияр,цIийи лезгияр.

Гьар са карда квехъ хьурай гьерекат,
Кьиле тухуз  чи мелни мярекат.
Акатрай лугьуз хайир- берекат,
Бегьердин цIирер,цайи лезгияр,
ЦIийи лезгияр, цIийи лезгияр.

Шарвилидин тур,Давудан гапур,
Алкьадар Гьасан- Эфендидин нур.
Зиярат хьанвай  Ярагъвидин сур,
Чешне хьурай квез- гъвейи*  лезгияр,
ЦIийи лезгияр, цIийи лезгияр.



*Гъвейи- ч|ехи