беларускiя ненародныя замовы

ад пахмелля:

Баба з возу. З носа юшка.
Ціск сусветны вочы плюшчыць.
Знікні, ноч, з мазгоў на золку!
Не трашчы, мая галоўка!

ад насмарку:

Ад радзімага парога
Прэч, смаркатая хвароба!
Хай засохнуць на пячы
З майго носу смаркачы!

ад паносу

Вар’яцей няма хваробы,
Чым дзіравыя вантробы.
За лясы, за чорна мора
Пранясе хай гэта гора!

ад кашлю

Выйдзі, сонейка гарачае!
Сціхні, лаянка сабачая!
Гэць у будку, пустабрэхі, –
Я не буду болей кэрхаць!

ад зубнога болю

Неба хмарай крывіцца,
Нібы мае сківіцы.
Ці налева, ці направа –
Выйдзі боль з зубоў дзіравых!

ад свінога грыпу

Небяспечную заразу
Тузік хай парве адразу,
Нібы грэлку на анучы!
Здохні, здохні, грып парсючы!

ад гемарою:

Ў цёмным лесе цёмнай ноччу
Птушка пугач лёс сурочыць.
Хай пасмокчуць ваўкалакі
Кроў дурную з маёй сракі!

ад спалоху

Цёмным лесам з цёмным півам
Едзе дзядзька непужлівы.
Ты за дзядзькай ўслед ідзі,
Выпі піва і не бзді!

ад  ікаўкі

Дзень з мяне рагочуць людзі! –
Злая трасца шчэміць грудзі!
Шыты быў не лыкам я –
Сыйдзі, сыйдзі, ікаўка!

ад  касавокасці

Рукі ў гору. Вочы ў бокі.
А чаму ж я касавокі?
Спіртам развяду ваду –
Вочы разам зноў звяду!

ад рожы

Ёлы-палы! Палы-ёлы!
Сёння я дурны і квёлы!
Заўтра буду я прыгожым! –
Знікні, рожа, з маёй рожы!