Шамбала

ШАМБАЛА
Индияйиъ
А, к1ура, дере уткан,
Гафар`инди
Дидкан пуб ву аьхю гъагъ.
Пис кьастарин
Улихь ву думу мюгькам,
Марццидариз
Ву, к1ур, женнетсиб ужагъ.

Инсанаригъ
Уьмур хъап1ну чпин кьадар,
Марцци рюгьяр,
К1уру, уч шулу душваз.
Жил`ин али
Читинваларра адар,
Адар душваъ
Пис кьастарра гъювал к1ваз.
 

Индияйиъ
А, к1уру, дере уткан,
Ву, к1ур, думу
   Аьршдин фагьумдин гъала…
Инсанари
Кьисйир кадагъна дидкан,
К1уру дидиз
Гирами йишв – Шамбала.

Шамбалайиз
Гъягъюз ккунир ккунду, к1ур,
Ук1арикан
Дап1най гъядлан улдуч1вну.
Гъядун исикк
Ягълишнаъ, гьич хътрубкьру ул,
Нир гъябгъюра,
Лепйир хъаъри чан кьалу.

Гуч1 шулу, к1ур,
Думу гъяд`ин улуч1вуз
(Гьарсар касдиз
Уьмур багьа ву, аьхир).
Дина душну,
Адар гъахьир кьяляхъ гъюз.
 
Гьамци думу
Кьиса дубхьна тарихи.

Амма узуз,
Гьугъубжвурзуз, Шамбала,
Гьамкьан уткан
Ва гьадмукьан гирами,
Айиганси
Гьарсар инсандин чан  к1ваъ.
(Табиаьтдин
Кьувват даринхъа гужлиб!)

Анжагъ дина
Гъабхурай жилгъа жини
Гьадабт1уру
Бахилвали, пис кьастну…
Хаинвали,
Аьрсузвали ва куч1ли
Адауру
Инсанар рякъ`ан гьякьлу.

Индияйиъ
А, к1ура, дере уткан,
Гафар`инди
Дидкан пуб ву аьхю гъагъ.
Пис кьастарин
Улихь ву думу мюгькам,
Марццидариз
Ву, к1ур, женнетсиб ужагъ.

Инсанаригъ
Уьмур хъап1ну чпин кьадар,
Марцци рюгьяр,
К1уру, уч шулу душваз.
Жил`ин али
Читинваларра адар,
Адар душваъ
Пис кьастарра гъювал к1ваз…

Шамбалайиз
Марцци рюгьяр гъюрубси,
Гьарсарин к1ваз
Гъафнийиш аку гьиссар,
Дургидийи
Дюн`яйилан, дархьубси,
Хаинвалин,
Дявдин, пис кьастнан амсар.