Вирень васечнемат

Аськолян весяла мяльса
Ичкоздень вирьста кинява.
Мезьге аш зепсон, аш эльсон,
Кядьнучксон кядьгонясь шава.
Кенордайхть мельган идьморхне, –
Янняньке куд шири ладяф, –
Кеняртьфт, эсь ётковаст корхнихть,
Пангса синь кептерьсна прядафт.
Таколдозь васьфтемазь велесь,
Кенкшенза панжадот келес.
Ломаттне варжакснихть ширенк,
Абонготфт, лафтусна кирентьфт.
Тошкамат марян эрь пирьфста
(Нарьмонькс синь лиихть курнява):
   – Козяста иттне сайхть вирьста,
Обжазе алять Вирявась.
   – Пади, аф шарьхкоди пангса?
   – Фкяня изь му сон, неушта?
   – Тяни сон пачкалга лангса
Панга вастс сизефонц пуштсы.
   Ломаттне кяльхть шовайхть абон.
Вирьста мон саян аф ськамон:
Ашуяф ваймозень утомс
Лама няйф паршида путонь.
Васьфнемань вирьса инь ёжусь,
Пулоса тяйсь ингольнязень.
Нумолхне пильгозон ёлождсть,
Кодак синь келаськять няезь.
Шякшатась нярьса шуфтть карай,
Мярьгат, куд шапи эзк – вири.
Копонц лангс марьхть сеельсь марай,
Аноклай инжикс урть шири.
Кулень, юватькшнесь вирь азорсь,
Менельсь мянь пачк цють изь лазов.
Рангсь кичкор мадясь аф парда,
Тяфта върьгазть сон кирдсь-кардась.
Эрьхке ваксс ваймама лотксень,
Ванфса ульмань сиянь калня.
Уендсть сельминголен локстихть,
Шнамс мазышиснон – аш валне.
Сембе вирьэряйхне нокасть
Мялезень кодямс цютькада,
Мороса седизень токазь,
Ваймозон сталмот исть када.
Кядьбесон кептерсь катк шава,
Тянди туфталсь аф Вирявась.
Тясонга тейне удалась
Мархтонза салава паламс.