Вирьса

Вармась ласькондсь шуфттнень алга,
Шуфттнень прява эфтезь-эфтсь, –
Налхксемс-колендемс вешсь ялга, –
Вирть илядыкс щамонц нефтсь.


Ащи тумось, лятфни кизот,
Ваясь арьсеманзон ёткс.
Вармась перьфканза шарсь, – сизесь,
Визьксшинь сюнеда кяшсь лоткс.


Сёксеть нарфоц сетьмось-янгась,
Мельдень лопась палозь прась.
Шобда веня тяштень янга
Тялоть кучелксоц се сась.


Ваны – штадот шуфтонятне,
А пильгалост – коцайхть цяткт,
Апак адерлякт кузнятне,
Акша орса апакт щакт.


Нать, изь сата сёксеть эрьгац,
Сясы вирьса аяш лад.
Кучелкссь сонцень тялоть серьгядсь,
Штоба тиель сяц уряд.


Арды тялось кельмонц мархта, –
Акша лишмонза кильтьфт нурдс, –
Акша тюсса перьфпяльть архты,
Арды ляйнь-паксянь туркс.


Пачкодсь вири. Вирь търваса
Сизеф лишмонзон пърьгафтсь,
Маряфтсь прянц сон азоркс тяса,
Кепотьф мяльса тефт сърхкафтсь.


Келуть лешкаса пъргазе,
Мярьгат, ёрдась сапонь шофт,
Тумоть ялгакс кътмордазе,
Лаподсь лафтувонц лангс лофт.


Кодак тялоть саманц марязь
Зверьхне, вирень кужу састь.
Сембе одняса щасть-карясть,
Тялоть васьфтема сърхкасть.


Ласькихть, кенордайхть кинява,
Эхянь инголи върьгазсь.
Пиче пряста сязьганц, нява,
Лямбе васьфтемань вал азсь.


Аньцек офтсь, няк, – кичкор мадясь, –
Вирень ялгада илядсь,
Кархчста-мезьста ута ладясь,
Кяжда рангознвсь и мадсь.