Апак учсек жольняфтсь вишке пизем, –
Начка муськомкс арась лангстон щамсь, –
Лопафтозе пульса вельхтяф кизень,
Меле ворьгодсь: ведьбарец, нать, шамсь.
Кодак панда фталу эздон кяшевсь,
Рахась лангсон – кенярдсь, улема.
Комачазе перьфпяльть летьке эшесь,
Шиньгучкать псись опамсь удомас.
Менельсь ваясь потмаксфтома сенемс,
Пиндолды сияста сюрет кштирдсь шинясь.
Пиземса штаф панчфкясь шити венемсь, –
Кеняртьф, – сельмоведнянза путьнясть.
Адерлясь-щась келусь од ърьвянякс,
Лопанзон пес пильксонзон килькштай.
Кизе орадсь инголен кърьнянякс,
Сёронь паксясь копшань таньф шиньфтай.
Сизефозе сонць изь кирде! – сизесь,
Мельган моли вайгяльбе лангс мадсь…
Ласькозь ётась кизонь вишке пиземсь,
Лама цебярь эсь мельганза кадсь.
Пиземда меле
© Copyright: Николай Циликин, 2016
Свидетельство о публикации №116012303347
Свидетельство о публикации №116012303347
Рецензии