Мон ащан веле песонк,
Картуззень къжморян,
А таколфсь калгай эсон,
Цють сельмоветть кирдян.
Вай, шачем-касом аймак!
Ки лангста тондейть сань.
Мондейне тошкай «ваймак!»
Тонь эшкскяце исань.
Шинясь сиянзон пяярдсь.
Кожфсь тядякс кътморяй
И прястон шаржу шяярть
Ужяльдезь сюдеряй.
Перьфпяльге розьбрянь кашторф, –
Тя паксясь терди кятть!
А жаворонкась маштозь
Мор ладонц вельфкан вятсь.
Лугаста ласьки-арды
Медяру панчфонь таньф…
Неушта, кать-мзярда
Мон улень тяста паньф?!
Вай, шачем-касом аймак!
Тонь пильгозт сюконян:
Простиндак пежу ваймоть,
Весть эздот аф туян.
Мърдань
© Copyright: Николай Циликин, 2016
Свидетельство о публикации №116012303312
Свидетельство о публикации №116012303312
Рецензии