Тялоньшобдава

Эх, лишмоне! арфтомасть ки апак содак!
(Прась ётай веть миньцонк пълманжава лов).
Аф токсихть катк пильгонте ардомста модав,
Эх, лишмоне!!! Арфтомасть шанчк кати-ков!
Шанчк ардомась седизень котьфти и ёлгай
И ваймостон нолашить эвфтсы мъзярс.
Эх, лишмоне! арфтомасть – тядова нолгад!
Шять, стак ащезь пильгонте шуфтомсть тънярс?!
Катк нурдозень фтала порфсь келепни пацят,
А поласне вайгяльбет ловть лангс китькстайхть.
Мон воляши маряфтонь тячи тинь лацонт,
Сяс паваззе элякотф нармонькс лийкстась.
Катк уромкшни шамазон цят моли кельмось,
И вармаське каршезон – пинекс взафтф!
А тялонясь-тялось! – ватт, кенярьфти сельме!
Сон сенчтади акшензон перьфпяльге срафтсь…
Няк, локалгодсь артфонте, пильгонте лафчемсть, –
Въдь мяльс коре теентьке кенордай кись!
Но вальмалон, няйсасть, ърьвязе кядь яфчай,
Тя корхтай сянь колга, што шонгарямсь пись.
Сяс пандя ни арфнемасть ловса кяшф янга,
Эрь меки мърдафтомасть ортазень лангс.
Кис серьгяди лажатфсь монь ваймостон янгась,
Илядсь-эрьгодсь порф потмос сизефти канкссь.
  …Пърьгафтсайне лишмонень, ярхцамбяль максан,
И васьфтьсы кудлямбозе якшамти паньфть.
Сувай куду эжема пинезе вакскан,
А каршезон општади шонгарям таньф.
Мон ловнять вазь лангстон сор ужу шукаса
И орозень повфтаса шуфтонь тулняс.
А полазе мъзолдозь ащи мъргаса,
Търванзон пърдазень руця уженяс.
Сон лямбаза ведняса штафтсыне кяднень, –
О! тяфтане улеза кудсон монь флангс! –
Нюрямняста паласа ёмла иднязень,
А оцюнясь ёрдай пря мяштезень лангс.
И маряса, кяднень вастс пацяне шачихть,
Синь эсьотям лиихть ърьвязень къргас.
А полазе каршезон: «Кельгомняй, вачеть? –
Кунара ни учси тонь эсот шърась».