Сяськомань шиня

Сась тундась,
                панчф потмос ваясть саттне,
Лямбонц аф ужяльди
                менель тёкшста шись.
Шура стройса
                молихть ветераттне,
Кшниста валф солдатти
                вяти эсост кись.
Мяштьснон келес
                казнесна аф тяльгихть, –
Орденцна-медальсна
                пиндолфтыхть сият, –
Кядьнучксост гвоздикатне –
                толгяльнят…
Тячи сяда павазуфт
                мирса аш лият.
Ветераттне
                копорьготфт цютькада,
Коське мъзолфказост
                ваяфт сельмоветть.
Синь войнав
                шумбрашинь нардьснон кадозь,
Ванфтозь кяжи врагта
                марнек белай светть.
Синь Европать
                ялга толбачк кялезь,
Эрь шиня нюрьгсь вельхкссост
                аеркс куломась.
Маряй «тяштькст»
                войнась кадсь ронгс и мялямс,
Вень-ве эвфти онца
                стака удомась.
Аськолкс вийсна
                ветераттнень лафчемф,
Унокт неже эземс
                кядьбезост кундасть.
 Тячи теест
                сюконяй эрь панчфкясь,
Тячи аньцек теест
                пееди тундась.


   …Пряснон комафтсть
                кевонь-кшнинь солдаттне,
Эрек панчфонь каштазс
                карксэземге пезсть.
Масторть келес
                шавихть пайкт кураттне,
Тячить мазышинцты
                синьге афкукс лездсть.