В Е Л И

            (Ошса эряй ялганенди)


Ошста аськолян шачема вели, –
Лажатфсь мяштезон идькс кътмордаф, –
Перьфкан паксятне пефтома келихть,
Сиянь лешкаса вирьхне пъргафт.
Ваны лажназь катф ошезе мельган,
Арьси-надияй: меки мърдан.
Но мон велезень седиге кельган,
Тячи янозень тоза кирдян.
Пингсь куватьс эсон ошева ёрясь
(Эрьгав кизонень орадсь кърьняц),
Эрямс таньф марязь ичкозде шорясь
Шачем велезень шуфтонь кудняц:
Кунелясь эсон ошти, ванфтсь-кородсь,
Марязь мялямсон пульхксь-киськорясь,
Шонгар онцтон юватькшнесь вень корожкс,
Шистон атякшец тердсь-кукорясь.
Эрек ваймозень мезенди калмамс
Ошень пиндолды уликснень ёткс?
Нинге сяськови вели кувалмось,
Прокс изь наксада ётксонок соткссь.
Катк хуш инголен стяй кели моря,
Шятян-аськолдан ведензон вельф.
Мон въдь веленнян шачемас коре,
Тядякс шачема велезе келькф.
   Ошста кенордазь аськолян вели, –
Лажатфсь мяштезон идькс кътмордаф, –
Няйса ичкозде: ортац панчф келес, –
Тоза монь бокон пялькскязе праф.