Велень васечнемат

Кода вишкста ласькихть шитне!
Кода кенордай, ватт, пингсь!..
Нарса вельхтявсть вели китне,
Ацавсь сордишеса тингсь.
Роди ёфси аф кунара
Лашму ласькондень умбравс.
Лятфнембяленди ся арась,
Лядсь идькспингонь ляй трвас.
Роди ёфсикс меля-мана
Морсесь кельгомазти цёфкссь.
Ононьбачк ся пингть лангс ванан, –
Мялямсь мърдци мазы ёфксс.
Тячи ошень онне явасть…
Вели сань аф шавонь кятть;
Молян комафтф прят ульцява,
Палакссь серьсон, – апак лятть.
Сязьганц чакорды кальть пряса.
Толгавть кизефксонц кулян:
«Азка, кинь имафтоть тяса?
Коста эрьфтеть тяза ян? –
Сонць жа отькорь кирьхксты тошкай
(Коволс тошкамац лийкстай), –
Улема, сон оцю ошста, –
Питни щамоц таньф шиньфтай.»
Мельган шамор пине шятни, –
Аш увамшкац, нюрьги пряц, –
Велеть эзга эсон вяти,
Удом вастонц ямбарсь кадсь.
Няйса, куттнень пондсна кемот,
Вельхтяфт прясна маштозь, лац.
Аньцек эздост шавот кемотть,
Фкять-кафтть качады турбац.
Аш шумбраксты, аш пъшкяди,
Ваны шава вальмянь глянцсь…
«Орта лангозонк листь, тядяй!
Сась идняце, – ошста мянць.» –
Тяфта анокан ювадемс.
Валне сускф тървазон эрьхтсть.
Равжа верса седись валовсь,
Ваясь сельмоведень эрьхкс.
Ваймось вярьгак вайгяльхть летняй,
Тошнась мяштти куйкс пупай.
Перьфкан калмолангонь сетьме,
Кенкшса кшнинь замоксь нувай.