Ловонь порф

                Р. Орловати

Нинге мялямсон ваннекшнян-короткшнян сёксеть,
А кенкш фталон ни сифонди лофт тялонь порфсь.
Шаржу лешкаса сёралнень салава токси,
Вельхксстон менельське сенемонц ков-бъди ворьфтсь.


Ловонь порф, ловонь порф, тята коленде лешса,
Тята сашенда юргома ортазень лангс.
Ловонь порф, ловонь порф, тоньцтот тяконять вешан:
Лафтубрязон тят путне аф эрявикс канкс.


Од стирькс пингозе кадомань – тусь акша локстикс,
Лятфнембяленди элезон толганя кадсь.
Ловонь порф, инголдамс тята кенорда сёксеть,
Катк сон кеняртьфни ваймозень нинге куватьс.


Ловонь порф, ловонь порф, виденцян, аф тонь кельган
(Сёксень кельгомас эсьотям ваяфтонь пря),
Сяс и эняльдян тейть: тята ласьконде мельган,
Кельме пацяса ронгозень тяк кътморя.


Ловонь порф, пинге сатсамань – васедян мархтот, –
Вдь эсь шкайгистот меки аф шарфтат-мрдат, –
Тята кенорда сёралнень шаржеса архтомс,
Эвфти тюсцень тон кой-мзярс повозт прдак.


Нинге сёксезень цятконза моньцон исть янга,
Ну а седизе вандыень шить кунеляй.
Лихтибрякс шави пайгонзон верозе санган,
Шуди ваймосон кельгомас кемамань ляй.


Ловонь порф, ловонь порф, тята коленде лешса,
Тята сашенда юргома ортазень лангс.
Ловонь порф, ловонь порф, тоньцтот тяконять вешан:
Лафтубрязон тят путне аф эрявикс канкс.