Кизонь ши

Яноц кизонь Шить кувака, 
Аш мъзярда нюрьгсемс эшксса, 
Да и тевонзовок стакат –
Прядамс кенерьхть – эздост пяшксе.
Кодак варьхмодсь, оноц явась,
Штазе шаманц раса летькса,
Эряфть од шинц кис бславась,
Панчфнень адерлязень петьксса,
Нармотть морама тердсь-серьгядсь,
Садса марьхнень бокснон мазептсь,
Изь ужяльде валдонь эрьганц,
Псинц шиньберьф перьфпяльге казендсь,
Тишень косьфтайхнень лугаста
Пруду эшеляма вятнесь,
Золотань тюс сюролдаса
Канзерфтсь кенерьф сёра прятнень.
Ашезь кирде, изь сударда
Траксонь стадась Шить псинц ала –
Тетькстаф одархт ляи арды;
Сизеф постуфсь кяли фтала.
Сембонь мельге псиса тонцесь,
Сембе ёрасть псида кяшемс…
Шиньгучкать Шись валгондсь сонцьке
Эшендема сери эшис.
Опана псиц вий машфтсь, сизефтсь,
Нильготьфтсь ваймос ласьфти пуромкс.
Апак учсек, апак кизефтть
Масторть вельхксс туцят усксь-пуроптсь.
Равчса архтозень туцятнень,
Пуворязень начка муськомкс.
Ваясть летьке кожфс ульцятне,
Пизем веттне таргавсть уськокс.
Вальмя сельмотне штавсь-нардавсть,
Нъльне пеетькстомсть цютькада.
Перьфпяльсь куфкстсь и вайме таргась,
Озаф седихть сърхкси мадомс.
Лямбе пиземняда меле
Ушеса псись сетьми-янгай.
Шись вирть фталу курьксты-веляй
Атямъёнгонь седня ланга –
Пинге теензонга ваймамс!
Лиси Ковнясь – Шить дуганняц –
Валсы шонгар валдса аймакть,
Полаткс тии аканц янняс.