Ласькозь ётась лямбе кизось,
Пингонь киста шаркстась – кяшсь.
Шиське визделгодсь (нать, сизесь),
Кеворсь шаржу коволть эшксс.
Ковнять сельмованфоц эшендсь,
Кельмось, колавсь мзолфкац.
Тяшттне пяярсть сери эшис,
Китькст сияннет мельгаст кадсть.
Шуфттнень сязендевсть руцясна,
Щашендсть ветне равжа орхт.
Аф кулят илять ульцяса
Гармонистонь серьгятькст – морхт.
Учи васьфтем вастсонк пизелкссь:
Имошт аноклай-килькштай.
Аньцек сёксень кельме пиземсь
Пильгокиньконь машфты – штай.
Эрькстасть кельгоманьке, кирендсть,
Фкя-фкянь шири копорьхть шарфтсть.
Васень кельмось, шять, изь кирдев,
Пади, шяйсь палф лопань нарфс.
А въдь ёфси аф кунара
Сельмодсь тейнек морай цёфкссь.
Мороц шкайгизонк лядсь-арась
Кода пялес азонтф ёфкс.
Нардьфтома кельгома
© Copyright: Николай Циликин, 2016
Свидетельство о публикации №116012110466
Свидетельство о публикации №116012110466
Рецензии