Порфу вармась тоса, тяса
Юрги, ласьконди, лътай.
Ловонь фальхнень серьсна касы,
Тялось акша зиблект стай.
Якшамсь лешса вальмат архты,
Прянц аф няфнесы шинясь.
Къзядейнясь вермяштть мархта
Штада кальть пряса цифняйть:
«Кельмось эци паця алонк,
Пексонк паморькскявок аш,
Вачашида рязозь-палозь
Лиемс эрьгяняньке маштсь.»
Уле кирьхксне вальмять пряса
Кирентьфт, сетьмость, аф чильняйхть,
Эрькстасть, вачетт, – тевсна ряса, –
Аньцек сельмот чипоряйхть;
Весть аф вестьке велеть келес
Лийкснихть сюдоф уроскакс,
Вальмя глянцти чакайхть пелезь:
«Тейнек стака тялонь канкссь.»
Сяван седяфкя шуваня,
Вадявняста инзетьса,
Чакан андомкань сюманя,
Вальмя инголенк итьса.
Каян ямкскат, толгафт тердян.
Сайхть синь топодемс пупайхть.
Паця лангсост вельми эрьгясь,
Тялонь пелькссна порфс юмайхть.
Тялонда
© Copyright: Николай Циликин, 2016
Свидетельство о публикации №116012110407
Свидетельство о публикации №116012110407
Рецензии