Од шить ушетксоц

Нинге аф шобдава, но и аф ве,
Менельса тяштенянь пиндолфне оласть.
Монь удоманязти маладсь-сась пе,
Лафчаза оннязе срадсь-каладсь, колавсь.


Нинге изь варьхмоде, шобдась изь ту,
Валдське аф кенордай келептемс пацянц,
Мялямсь эсь ушетксонц нинге изь му –
Ваяфан шонгара арьсемань мацяс.


Роди и сргозень, – сельмоне коньфт,
Ононь иляткскаса васту люпштафан, –
Нинге аф сашендан аруяф ёньц,
Пингозень васта лангс абон имафнян.


Уи тървафтома ляйге перьфпяльсь,
Опамф кудботмозе пефтома сетьмос.
Пингсь, мярьгат, комлявста ичкозде кяльсь,
Тятярдезь эрьготьф кинц тяряфни петемс.


Адерляй – аноклай Тячись Исякс,
Канкс мархта учи ни кенкш фталон Вандысь.
Шкайгизти кеман (аш кода илякс!):
Эряфонь янозон ару тюст канды.


*       *       *


Зарявась кумаценц повфтась,
Толонь налхт ляцсь модать мяштьс.
Шобдась эвотьф равжа офтокс
Туста вири ворьгодсь-кяшсь.
Летьке, уле кожфонь качамс
Эрьгодсь ляй тървастонь кись,
Пянакудста таргаф пачакс
Менельграйти кеподсь шись.
Пацят яфчай, толгат ёряй –
Шнай шить ушетксонц атёкшсь,
Жаворонкась ялгас коре
Кеподсь моронц менельть тёкшс.
Панчфне мельганза прят венептсть,
Таньфонь панар кожфкясь стай…
Тоду лангстон ару-сенемс
Сргозьф оннязе лийкстай.




     *            *            *



Нинге тердян ётай венять:
«Хуш аф ламняс мархтон лятт!»
Од шинь стямас кядне венептьфт,
Эзост прасть зърнят, сият.


Вай, мъзяра валтта вельхкссон!
Вай, мъзяра ару тюс!
Тячить саманц шнаян, кельгсян,
Мяльне пялтьфт шинь стямань уськс.


Ару кожфкясь мяштти ёлгай,
Штада прязень сюдеряй.
Арьсемане тёждя толгакс
Ёнь нюрямнясон нюряйхть.