Мокшэрзянь крайнязти

Ожука, лувизе, монга пъшкядян,
Мокшэрзянь крайнязти весть виденцян:
Мондейне арась сон омбоце тядякс,
Сяс, кода тядянь пильгс, мон сюконян.


Сенчтади менелец вельхкссон най мани,
Шобдавань зарянза толса юрнайхть.
Тяса тундась панчфу варманзон пани,
Нармонень моротне седис сувайхть.


Инерка эрьхксонза эшеляйхть локстихть,
Паксянзон комболфты сёронь волнась.
Пичензон прясна туцяс эмянь токсихть,
Кенордайхть оцю ведьс Мокшесь, Сурась.


Сисем тюс седь кизонясь кодак стяфты,
Алганза ётай кштизня пиземнясь.
Меле шинять ляпе коволсь нюряфтсы,
Соты малиновай шальканц кстынясь.


Сёксесь эсь коензон-тевонзон кельги:
Праздникшинь паляса адерляй-щай,
Ёрдай зърнят кепотьф нармоттнень мельге,
Чивгонь кърганянзон повфтай-килькштай.


Тялотне миньцонок ловуфт и кельмот,
Чушмот куд сереса порфне уфайхть.
Кельгиень лемс чипоряйхть тяшттне сельмот, –
Няелесть, кода синь валдста крфайхть!


Мокшэрзянь крайнязе тевсонга мазы!
Ялгаксшинь ванфтома машты сон лац.
Ичкоздень кис ильхтемс лямбе вал азы,
Конаконь каванямс анок шърац.

Повсонза салава кяжгев аф кирди,
Ваймоц сонь панжада, мяленза валтт.
Пялонза инжихть сайхть ичкозде-ширде,
Азондыхть кельгомга паронфты валхт.


Мокшэрзянь крайнясон эрямась пара!
Тяза монь бокононь вядьмозе праф.
Мондейне омбоце тядякс сон арась,
Мархтонза шкайгизе сотнеф-сюлмаф.


Мокшэрзянь крайнязе! Паваз тейть арьсян!
Менельсот наголь катк пееди шись!
Эряйхне улест най адерляфт-карьсефт,
Моркш лангсот весть катк аф шумори кшись.