Цацар алай сим

Цацар алай сим
Ни ихтияр гана? Меслятсуз
Халкь кьве пайна юкьвай тIуз,
Сергьят кьуна лап инсафсуз,
Тухвана икI дуьгуьм-дуьгуьм
Цацар алай сим, цацар алай сим?!

Зун - и пата, дах - а пата,
Вах — и пата, бах - а пата.
Мукьва-кьили, стха-арха,
Чара авунва, гьидакай гьим,
Цацар алай сим, цацар алай сим?!

А патай атун, и патай хъфин
Гьикьван къе чаз хьанва четин.
Низ акур тир зулум ихьтин!
Гьелек-фелек авунва гьим?
Цацар алай сим, цацар алай сим?!

Чун саналлай багьри халкь яз,
«И пад», «а пад» авунва чаз.
Мягьтел яз чун амукьнава,
Вуч нагьахъанди я ви гьукум,
Цацар алай сим, цацар алай сим?!

Чил сад я чи, чIал сад я чи,
КIвал сад я чи, мал сад я чи,
Санал хъхьун мурад я чи.
Мус ахкурай чи рикIиз чим,
Цацар алай сим, цацар алай сим?!

Сабурлу хьухь, я кас, Фикрет,
Ваз хъел къвемир, куьтягь суьгьбет!
ИкI къакъатунар амукьич, гьелбет.
Халкь пай хьунал рази же да гьим?!
Терг хьурай вун, цацар алай сим!
Терг же да вун, цацар алай сим!