Гьикьван жеда ви явавал,
Куьтягь тежер хьурхьур хьана ?
Хъжезмач хьи ви аявал,
Кьуд кьил ягъиз къудур хьана.
Цава туна ругни кьал-ц|ам,
Сириштасуз кьац|урна на.
Куьчеярни михьи,ц|алц|ам
Зирзибилдив ац|урна на.
Кук|варна зи пенжер,сахси,
Заз къалуриз жуван кесер.
Вун кьадарсуз хьайт|ан аси,
Жедач вагай зун дердисер.
Ви давамвал вад югъ хьурай,
Адлай виниз мад жедани ?
Вад юкъуз вад зиян гурай,
Ажуз хьана зун шедани ?
Азгъун хьана къалуриз гуж,
Ийиз к|ан я заз дуьнья дар.
Чаз далдаяр авачиз туш,
Зи далудихъ дагъ гала,гар.
Ц|ару дагъдин фида кьвет|ек,
Зунни руьгьдай аватдай туш.
Гьана за вахт акъудда тек,
Ви гуж аник акатдай туш.
...Са пакамахъ жеда мягьтел
Кьуд пад лацу,жив яз къалин.
Хуьр галайнихъ жеда зи гел,
Рик|е- гьиссер гъалибвилин.
Гар
© Copyright: Сейфудин Шахпазов, 2016
Свидетельство о публикации №116011407083
Свидетельство о публикации №116011407083
Рецензии