Рик1ин т1ал

Санал хьанач,са к|вал хьанач къул хьанач.
Тупламишдай кьуват хьанач,пул хьанач.
Халкьдихъ руьгьдин дестек хьанач,гул хьанач.
Бес кьулан вац| ч|ур тежедай цал яни ?

Югъ-къандавай гьатзава чун деркела,
Кумек авач я к|валяй,я къецелай,
Халкьдин вилик акъвазнавай месэла
Ц|илиналлай алуд тежер т|вал яни ?

Мал-къарани т|имил жезва дагълара,
Майва кьери,хъач къалин я салара,
А виликан бегьер амач багълара,
Лезги чилихъ галукьайди т|ал яни ?

Лагь идалай ч|ехи инад авани ?
Паб базарда итим хьанва кайвани,
Хиве гьатна цурамай са данани.
Тум кьац|ай сад,ам нехирда мал яни ?

Алимар я к|ел тавурт|ан улубар.
Уях хьанва чи хувьрерин хунубар -
Хур гайила ч|ур жезвалда к|алубар.
Ирид аял авачирди к|вал яни ?

Баябан я хеб амачир яйлахар,
Чубан илиф тийиз перт я булахар.
Четинбур я лугьуз хуьре к|валахар,
Шегьердин рехъ жегьиларин квал яни ?

Аруш жезва къвез к|вачера нашияр,
Пиц|ни далу акваз къекъвез дишияр,
Гьар камуна гьалтзава вал гижияр,
Вил алайди къияматдин къал яни ?

Манияр я дишегьлийрин тарифар,
Кьисмет хьанач лугьуз ч|угваз гьайифар.
Кхьизвайбур халабажи теснифар.
Зи лезги ч|ал шит шурпайрин ч|ал яни ?

Иви хъвана тух тежезвай нахаяр.
Ягъиз-рекьиз чи квайни квай рухаяр,
Галуддани далудихъай архаяр?
Дуьнья гегьенш,чаз фир-тефир сал яни ?

Сейфудин на гьикьван гьалчда паркутар?
Уяхариз алахънава кубутар,
Эхиз тежез са жуьрени манкуртар,
Я кас, види дуьз чкадал къал яни ?