Рик1ин чим садрани рекъидач...

Ша к1аниди, ша  ацукьа  зи патав,
Дикъетдив мад чун сад садаз килигин.
Белкини зун  агатайла  ви къвалав,
Кьат1уда на зи гьиссерал илигин?

Зи к1аниди, зи вилериз це темен,
Вуна ам ви мурад я, заз лагьанай.
Ша, чун физвай, рекьерилай вил вегьен,
Кьасухдай хьиз гуьруьшдиз чеб атанвай.

Ша  килигин рехи хьанвай ч1арариз,
Живед ц1верек1в акатнавай вижеваз.
Муьгьуьбатдин ялав галай чарариз,
Рекье тунвай дерин гьиссер рик1еваз.

Ша вил вегьен яргъаз фенвай йисарлай
Язух тушни чак умуд квай инсанрин?
Сабур гурай чаз кьакьан пак цаварлай,
Рехъ давамдай гьарда вичин хизандин.

- Къакъатунин накъвар гьиниз авурай?
- Кутугнавач - са пай хьанва уьмуьрдин.
- Къакъатунин къай рик1яй гьик1 акъудрай?
- Гьардаз вичин рехъ ава чаз - жигъирдин….

- Ша, багьади, мад патав чун ацукьин, -
Зи хиялра лугьузва за т1алабун, -
Чи алемда са легьзеда амукьин»
Бажагьат я ваз  ик1 лугьуз  алакьун……

Къумадкайни вахтуни къван ийида
Амма ада чи гьиссер, ваъ, рекьидач.
Ви вилериз садра килиг хъийида -
Амма рик1ин чим садрани рекъидач.

фото с Интернета