Кьисасдин элегия

                Зун ракъурна вуна чиляй чилериз,
Лагьана:"Вун тахкурай зи вилериз"
 Арадал зат| алачиз зав къал  хьана.
Гьа ви вилик заз фир-тефир сал хьана.
Мад вун галай патахъдин элкъведач,
Гьа вун авай хуьруьзни зун хуькведач.
Зун элкъвена хъфида куь варцелай,
Гьаналламаз ракъурна вун рик|елай.
Белки ик| жен...Акъваз акъваз,яб це заз,
 Вилер ахъаз зун вилик кваз ваз такваз,
 Ви писвиляй,мурдарвиляй жен ваз гуж,
Ирид югъ жен т|вар атана "Буьркьуь руш".
 Духтуррал физ, дарман тежез хуьквен вун,
Жерягьрикай фарман тежез къекъвен вун.
Ц|еф ц|урурин,элкъуьрин вал кьелерни,
Гумни кухтан кана самун цуьлерни.
Зияратар,п|ирер,шейхер,Эренлер,
Дарман тежен Дербентдавай Къирхлер.
Вилаятда тефей чка тамукьин,
 Чара тежез,дава тежез амукьин...

Панагь жен ваз яргъай атай къарачи,
Чими хъийиз серин хьанвай ара чи.
 Къарачиди лугьун ваз:" Са негъениз
Рекье гьат вун къунши хуьруьз- Гелхениз.
 Са кас ава вине кьазвай намус-дин,
Т|варни адан язва, шаксуз, Сейфудин.
Гьада гайт|а ви кьве вилиз кьве темен,
 Экв хкведа,ахквада ваз денбеден"

Кич|ез-регъуьз кьуна бахдин хъуьч|уькай,
Вун чи варцел къвен вядеда мич|и хьай.
Чанда авай ажугъдин ц|ай квадарна,
За жува-жув ви къужахдиз гадардай.
За кьве темен гудай куз-куз вилериз,
Пуд мад гудай:сад к|уфуз кьвед хъуькъвериз
.
Ирид къалай шадвал ахкур веледдин,
Ван жен зазни ви дидедин минетдин:
"Рик| алай руш ви гьуьрметриз хас хьурай,
Вун зи езне,зи бала ваз свас хьурай"
 "Хутах ви руш,тахкурай зи вилериз".
Ван хьайила вун фин чиляй-чилериз.