Ша Ширинбег

Ша,Ширинбег,хкаж жен,дуст, сувуз къе,
 Яйлахри цуьк акъуднавай береда.
 Вахт гежелди тевгьен чна гьат рекье,
 Гурлу межлис къурмиш ийин Куьреда.

 Хевлетвили гуьгьуьлдизни таъсирда,
 Ви вилер заз гьич гъамлу яз такурай,
 Суван т|улал шад легьзейрин есирда,
 Гъам квадарна,ялавдивди ац|урай.

 Чун к|анибур  мугьман хьуй чаз атурай,
 Ярар-дустар чи межлисдин дамах я.
 Дуст галачир югъ бендедиз такурай,
Дуст дустуниз яман йикъан панагь я.

Абасазни ша лугьуда ч|агъан гваз,
Адан чиник шадвилин нур акатда.
Гъулугъалай хаму к|елни къажгъан гваз,
Хабар хьайи Закир стха акъатда.

 Мугьман жада Къван хъит|кьинай булахдиз,
Адан кьилел чи мерд суфра ачухда.
Шишкабабдин атир чик|из яйлахдиз,
 Дустар галаз йиф экв ийиз ацукьда.

Дагъларик ван кутаз ч|агъан акъажрай,
 Чи бейнидиз дегь девирар къведайвал !
 Туьд ацурна"Суваллай яр "хкажрай,
 Чи бубайрин руьгьер уях жедайвал.

Ч|агъандинни булахдин сес акахьна,
Тамадани акъатайла кефиназ
Ширин мани гьа булах хьиз авахьда,
Гьуьсейнани лугьуда чаз "Селминаз"

 "И дуьнья са фана багъ я",-Эмина
 Гьавайда туш лагьанвайди,чиз я дуст.
 Чи уьмуьрдин лап пашман югъ демина,
 Тост тахьайт|а ахьтин дуьнья куьз я дуст?

...Ша Ширинбег.хкаж жен,дуст, сувуз къе,
 Яйлахри цуьк акъуднавай береда.
 Вахт гежелди тевгьен чна гьат рекье,
 Гурлу межлис къурмиш ийин Куьреда