Акафист преподобному отцу Паисию Афонскому

Кондак 1

Избранный Афонския Горы подвижниче и кадильница благоуханная,
Каппадокийское прозябение и предстатель за нас к Богу неусыпный,
чадо послушания Божия Матери явился еси, тем же вопием ти:
радуйся, преподобне отче Паисие, дивный народа Божия утешителю.

Икос 1

Ангел во плоти показался еси во уделе Пресвятыя  Богородицы избраннем, и нам Ходатай теплейший пред Богом буди, Паисие отче наш, да тя вси воспеваем сице:
Радуйся, Каппадокии благоуханное миро; радуйся, небесного жития образе.
Радуйся, Малыя Асии процветение; радуйся, преподобного Арсения похвало.
Радуйся, в фарасиотех приснопеваемый; радуйся, инокам благочестивым правило.
Радуйся, Эллады и веры православныя хранило неусыпное; радуйся, Каппадокийская похвало.
Радуйся, Византии светило велие; радуйся, Афона доброто и украшение.
Радуйся, земный ангеле, Богу послуживый; радуйся, небесный человече, на Небеси от Господа прославленный.
Радуйся, преподобне отче Паисие, дивный народа Божия утешителю.

Кондак 2

Видяще, яко от руки священного Арсения в Фарасах Каппадокийских, отечестве святых, крещение приял еси, и яко сего молитва многоплодну тя отрасль Малыя Асии и Эллады яви, тя прославляем по достоянию, Богови вопиюще: Аллилуия.

Икос 2

Разумея и познавая страдания из отечествия произгнанных, странствуя и печалясь о разорении дома родительскаго, в вере укрепился еси и богоразумия приял еси свет от благодати Божия, Паисие святе. Сего ради и мы, взирающе на чудеса твоя, восклицаем ти таковая: 
Радуйся, Иисусовых благословений стяжателю; радуйся, удела Богоматери благостный жителю.
Радуйся, подателю многомудрых благодеяний; радуйся, ароматнице Вышняго дарований.
Радуйся, Божия Духа блаженнейшее сияние; радуйся, добродетелей несказанное благоухание.
Радуйся, Афонская леторасле прекрасная; радуйся, аки купель Силоамская, врачуяй всякия страсти.
Радуйся, Пресвятыя служителю преблаженный; радуйся, Святыя Горы вождю победоносный.
Радуйся, поста и молитвы делателю неусыпный; радуйся, заступниче страждущих и опечаленных.
Радуйся, преподобне отче Паисие, дивный народа Божия утешителю.

Кондак 3

Силою Вышняго укрепляемых мучеников читая жития и разумея, ты душею блаженною к непрестанному славословию Всетворца восходил еси. Мы же сие воспоминающее, вопием: Аллилуия.

Икос 3

«Аз есмь Воскресение и Живот. Веруяй в Мя не умрет во веки». Сии словеса от Небесного Жениха услышал и исполнился света божественнаго, неверия же прелесть низвергл еси, отче Паисие. Сего ради благодарственно вопием ти:
Радуйся, во отрочестве безбожия сети победивый; радуйся, яве Христа узрети сподобивыйся.
Радуйся, обители Стомионския устроителю; радуйся, Конитских еретиков посрамителю.
Радуйся, милостыни поток неисчерпаемый; радуйся, небесным сиянием укрепляемый.
Радуйся, Синайския горы подвижниче; радуйся, обители великомученицы Екатерины молитвенниче.
Радуйся, мудростию деве сей подражателю; радуйся, святым Галактиону и Епистимии сожителю.
Радуйся, саде, процветший от горы Моисеевой; радуйся, молитвы Ангельския на земли воспевал еси.
Радуйся, преподобне отче Паисие, дивный народа Божия утешителю.

Кондак 4

Рачение божественное к Богоматери, чистейший отче, имея, Сию Предстательницу неусыпную и Хранительницу стяжал еси. Сего ради и мы, дарований твоих желающе приобщитися, о тебе поем: Аллилуия.

Икос 4

Слышаша имя твое земные концы, Паисие святе, ты бо, яко солнце озарял еси во времена последняя и Православие утверждал именем Господа Иисуса Христа. Мы же, единомысленно воспоминающе божественная учения твоя, приношаем ти речения таковыя:
Радуйся, любимиче изряднейший Пресвятыя Владычицы; радуйся, ны ущедряяй, цветец Матери Божией.
Радуйся, сомолитвенниче Херувимом; радуйся, единонравниче Серафимом.
Радуйся, укрепление Православия; радуйся, утваре преизбранная.
Радуйся, черноризцев оградо и отечествия хранение; радуйся, Конице отрасле, Стомиона же заступление.
Радуйся, яко лоза Богоматере, благовременный плод приносящая; радуйся, вертограде покаяния благоухающий.
Радуйся, беседующий божественными словесы; радуйся, умащение язвам грешников.
 Радуйся, преподобне отче Паисие, дивный народа Божия утешителю.

Кондак 5

Богоприятну любовь яко стяжавый, в жертву себя братиям возложил и благословением Пречистыя оделяше всех. Таковаго ради себе отвержения, ныне со Ангелы Христа прославляеши, мы же, память твою призываем и вопием немолчно: Аллилуия.

Икос 5

Видевше тя душу свою за ближняго полагающаго, блаженне Паисие, к тебе прибегаем вси: милостив буди нам и, Владыце Христу предстоя, Того умоли, да отженет помрачающую греховную тьму от нас, сицевыми молебными песнями хвалящих тя:
Радуйся, Панагуды доблественный ратоборче; радуйся, Богородицы песнословче.
Радуйся, заблуждшим путеводная звездо; радуйся, зовущая к Богу Афонская трубо.
Радуйся, утешение плачущим; радуйся, помощниче страждущим.
Радуйся, печальных божественное укрепление; радуйся, иноков не оставляющий своим попечением.
Радуйся, у Милостивыя за нас предстателю; радуйся, недужных бездмездный врачевателю.
Радуйся, подвизающихся на путь правый направляяй; радуйся, изрядне Вратарницу Богородицу восхваляяй.
Радуйся, преподобне отче Паисие, дивный народа Божия утешителю.

Кондак 6

Проповедник богоносен показался еси и столп веры, дары Духа Святого нам испрашаяй, тем и мы тебе ради, старче предивный, немолчно поем: Аллилуия.

Икос 6

Возсияв яко лампада неугасимая светом Трисолнечного Божества, покаяния наставник явился, Паисие святе. Мы же, твоим предстательством свыше утешение и благодати познание приемлем, хваляще и вопиюще тебе сице:
Радуйся, отвержения и воздержания, ковчеже златый; радуйся, Утешителя благодать на нас изливающий.
Радуйся, Слово Христово маловерным провозвестивый; радуйся, милостию Человеколюбца всех удовливый.
Радуйся, о мире молитвою выну благоухающий; радуйся, яко вино сладкое души радостию исполняющий.
Радуйся, Богоматерью славно избранный; радуйся, приношаяй слезы Христу яко шипок благоуханный.
Радуйся, Фоверы предстательство и могучее возглашение; радуйся, откровения громогласное возвещение.
Радуйся, Тайней Вечери чистою душею приобщавыйся; радуйся, помыслов исповеданию прилежавый.
Радуйся, преподобне отче Паисие, дивный народа Божия утешителю.

Кондак 7

Хотящему тебе Спасу последовати, мученическаго жития ревнитель показался еси, душею нескверною же и телом, и любовию божественною ко Христу. Сего ради тя величаем все, согласно поющее Богови: Аллилуйя.

Икос 7
Новое одоление на невидимыя и видимыя враги показавый, егоже молитвою и любовию стяжал, и всеоружие смирения взем, истребил еси бесовския ковы и тщания, Богови же благодарственная возопи, тем же и мы приносим тебе сицевая:
Радуйся, света божественное хранилище; радуйся, благоутробия Христова вместилище.
Радуйся, псалтири Давидовы пение; радуйся, святаго Арсения умоление.
Радуйся, грешников исправляяй и ободряяй; радуйся, милование у Богородицы испрошаяй.
Радуйся, главо подвижников венценосная; радуйся, сень страждущим росоносная.
Радуйся, вода живительная претыкающимся; радуйся, мосте, в жизнь изводяй утопающих.
Радуйся, столпе грешником падшим и укрепление; радуйся, расслабленным тихий одре и упокоение.
Радуйся, преподобне отче Паисие, дивный народа Божия утешителю.

Кондак 8

Странен быв в мире, Паисие отче, Господа возлюбив и страсти твоя укротив Божиею благодатию, ныне же яко зарница облиставаеши о тебе вопиющих немолчно: Аллилуия.

Икос 8

Всяк к тебе притекаяй, николиже, отче Паисие, неутешен отыде. Но просяй благодати дарование приимаше. Сего ради и мы воспеваем ти сицевая:
Радуйся, лученосная звездо омраченным; радуйся, кающихся главо и наставниче.
Радуйся, афонския братии тяготы вземляй; радуйся, сада Всесвятыя Богородицы цвете преукрашенный.
Радуйся, о благостыни Христове сладковещание; радуйся,молитвы небесныя мироухание.
Радуйся, мирови Мессию провозвещаяй; радуйся, ко Пресвятей песнь архангелову воспеваяй.
Радуйся, надеждою, милостию и любовию пламенеяй; радуйся, во вражией брани божественное омовение.
Радуйся, приявый дарование пророческое; радуйся, благоутробием Отцу Небесному подобниче.
Радуйся, преподобне отче Паисие, дивный народа Божия утешителю.

Кондак 9

Апостолом уподобляяся, всякому естеству проповедал еси слово, рачением же и любовию к ближним просиял еси, яко солнце на земли, прославляя Святую Троицу: Аллилуия.

Икос 9

Слез потоки от души мироточа, сердцем о человецех, страждущих душею и телом, боляше. Сего ради ныне и мы от душ наших песнопения ти возсылаем, в смирении вопиюще прилежно:
Радуйся, Евангелия служителю неутомимый; радуйся, свещниче Трисолнечного Божества неугасимый.
Радуйся, яко постничества ристалище совершивый; радуйся, яко смирением крайним иных предваривый.
Радуйся, во Афоне веры сияние; радуйся, Всесвятыя сладкое воспевание.
Радуйся, деяния же и зрения, учителю славный; радуйся, яко велемудре постиже божественное видение.
Радуйся, Пречистыя вертограда неусыпаемый делателю; радуйся, святым Лукиллиану, Пантелеимону и Евфимии собеседниче.
Радуйся, яко глас Богоотроковицы слухом услышал еси; Радуйся, яко Ту яве, аки на Иерусалимстей иконе, узрел еси.
Радуйся, преподобне отче Паисие, дивный народа Божия утешителю.

Икос10

Величествие со Элладою Каппадокии и теплый заступник еси, Паисие святе. Добродетелей бо лествицу богоугодно соверши, к Троице Святей непрестанно воспевая: Аллилуия.

Кондак 10

Стена верным, отче Паисие, ангельское бо житие возлюбив, подвиги своими Святей Троице предстояния неустанного скоро достигл еси. Сего ради пения благодарственная возсылающе из глубины сердец и душ наших, смиренно взываем ти:
Радуйся, от Афона богоявленно миру сияяй; радуйся, краснопеснивый гласе, Слово провозвещаяй.
Радуйся, многочадне, милуяй человеческая боления; радуйся, ослепленным даруяй исправление.
Радуйся, Неневестней Невесте радование приносяй; радуйся, к Царству Небесному путь удовляй.
Радуйся, кадилу Духа Божия соименне; радуйся, яко и зрак твой нам подает утешение.
Радуйся, яко в мира концех вещанием предваривый; радуйся, змия главу молитвою сокрушивый.
Радуйся, моления именем Иисусовым и среди мира делателю неустанный; радуйся, к Божией Матери стяжавый любовь несказанну.
Радуйся, преподобне отче Паисие, дивный народа Божия утешителю.

Кондак 11

Пение Зиждителю и Приснодеве с борением яже в нощи и во дни соплеташе смиренно, тем себя Божия Духа сосуд показуя. Мы же, Троице Святей припадающе, тебе ради поем и вопием: Аллилуия.

Икос 11

Свет и мироухание благочестия и любве, и самоотвержения неисчетнаго и исцелений точит святая память твоя, преподобне. Сего ради потщахомся вси молебными гласы тебе возопити:
Радуйся, яко всякому указуяй путь к Небесем; радуйся, яко радости всех исполняют медоточная словеса твоя.
Радуйся, изобильная реко от Афона искипающая; радуйся, звездо от Святыя Горы, верным путь озаряющая.
Радуйся, присное за ны у Богоотроковицы ходатайство; радуйся, ангельскому житию прилежащим предстателю.
Радуйся, добродетелей плодоноснейшая лозо; радуйся о мире к Престолу достигающая слезо.
Радуйся, новый апостоле, к вере Христове вся призываяй; радуйся, Православия гласе, мнози возсозидаяй.
Радуйся, древо всеплодное, Материю Небесною напояемое; радуйся, эллинов знамя, в подсолнечной распростираемое.
Радуйся, преподобне отче Паисие, дивный народа Божия утешителю.

Кондак 12

Благодати Божия источник тя познахом, отче, по успении твоем, в немже лицы ангельстии веселия исполняхуся. Тем и мы, ходатая о спасении нашем улучити сподобльшиися, радуемся, взывающе: Аллилуия.

Икос 12

Поюще бездну чудес твоих и терпеливныя твоя подвиги, святе, от сердец ти сплетаем ангельская песнопения, память твою почитаем благоговейно и вопием таковая:
Радуйся, отечествию забвенному надежды вестниче; радуйся, о свобождении Святыя Софии и града Великого проповедниче.
Радуйся, Царьград во упование новое дивно предуказавый; радуйся, от стран своих произгнанным ходатаю удела славного.
Радуйся, не токмо единоплеменных путеводяй, но и от иных язык приходящих; радуйся, яко сынов Российския Церкви зело любя, благоуветливо приимаше.
Радуйся, плененных отчин прорекий обновление; радуйся, миру блистание и веры немолчное возглашение.
Радуйся, яко знамения времен разумевый; радуйся, Откровения Иоаннова таинниче богодухновенный.
Радуйся, яко апостол, явлей обетования; радуйся, Малыя Асии избавления упование.
Радуйся, преподобне отче Паисие, дивный народа Божия утешителю.

Кондак 13

О преподобне отче Паисие, новоцвете благоуханный, израстший во времена последняя, умоли Христа Бога спастися душам о тебе воспевающих: Аллилуия (этот кондак читается трижды).

Икос 1

Ангел во плоти показался еси во уделе Пресвятыя  Богородицы избраннем, и нам Ходатай теплейший пред Богом буди, Паисие отче наш, да тя вси воспеваем сице:
Радуйся, Каппадокии благоуханное миро; радуйся, небесного жития образе.
Радуйся, Малыя Асии процветение; радуйся, преподобного Арсения похвало.
Радуйся, в фарасиотех приснопеваемый; радуйся, инокам благочестивым правило.
Радуйся, Эллады и веры православныя хранило неусыпное; радуйся, Каппадокийская похвало.
Радуйся, Византии светило велие; радуйся, Афона доброто и украшение.
Радуйся, земный ангеле, Богу послуживый; радуйся, небесный человече, на Небеси от Господа прославленный.
Радуйся, преподобне отче Паисие, дивный народа Божия утешителю.

Кондак 1

Избранный Афонския Горы подвижниче и кадильница благоуханная,
Каппадокийское прозябение и предстатель за нас к Богу неусыпный,
чадо послушания Божия Матери явился еси, тем же вопием ти:
радуйся, преподобне отче Паисие, дивный народа Божия утешителю.




Молитва ко преподобному Паисию Святогорцу

О преподобный и богоносный отец наш, Паисий Святогорец!
Ты, стяжал еси от Бога дар рассуждения, молитвы и сострадания,
Ко всем приходившим к тебе за советом и помощью людям. И ныне, приими от нас недостойных и грешных возносимые тебе молитвы. Умоли Господа Бога, даровати нам здравие душевное и телесное.
Больных исцели, унывающих утеши, нуждающимся помощь ниспошли.
Пастырей в вере православной укрепи, монашествующим молитву даруй. Вдовиц и сирот напитай и всех православных от козней вражьих сохрани. Заблуждших на путь истинный наставь и всех к Богу приведи. Даруй мир и тишину отечеству нашему, властем и воинству его. Да твоими святыми молитвами в мире сем Богу угодивши, сподобимся и Вечной жизни во Христе Иисусе Господе нашем. Емуже подобает Слава, честь и поклонение со Отцем и Святым Духом во веки веков. Аминь.