Танъ чыкъынынъ нефеси Дыхание ранней росы

ТАНЪ ЧЫКЪЫНЫНЪ НЕФЕСИ

1996 сенеси январь 14-18 куньлеринде вакъыт акъымы барлыкънен токънашып, бу сатырларны Хмельницкий шеэр  хастаханеси кардиология болюги хирургия ве реанимация палаталарынынъ пенджерелери астына септирип ташлары.
Оларны муэллиф топлап алды.

Анам Свишевская Валентина
Антоновнанынъ айдын хатырасына

I.

1. Фанийлерге — фанийлик:
2. оларнынъ гуняхы
3. чиль-парча этильген барлыкъта:
4. Башны котермеге не вакъыт бар,
5. Не де бир кимсе.

II.

6. Пейгъамберлер яваш-яваш
7. вакъыт акъымлары арасында
8. йылышалар.
9. Беклеяткъанларгъа
10. сийрек-сепелек токъунып,
11. къальблерине
12. шубе ве умютлерни
13. сачалар.

III.

14. Анъланылмагъан къальбнинъ
15. козю ачылды:
16. козьлери корьген джемаат
17. арасында оны ялынъыз
18. къальбдашы
19. анълая биле.

IV.

20. Кень ёл бойлап
21. узакъларгъа тез-тез юрип кеткенге
22. сукъланмайым —
23. чюнки о,
24. джетеменини корьмеген
25. сокъур.

V.

26. Мусафирликте
27. чокъ отурмакъ олмай
28. къарарнынъ къарарына
29. къарарнынъ кендиси
30. укюм чыкъара.

VI.

31. Фаний къалабалыкънынъ анасы —
32. эджель.
33. Эр шейни тертипке чекмек ве
34. ерли-ерине къоймакъ укъукъы
35. ялынъыз онъа
36. берильгендир.

VII.

37. Алланынъ назарынен
38. расткелишип де
39. эляк олмагъан
40. инсан —
41. Онынъ къулы.

VIII.

42. Онынъ бакъышы
43. шейтангъа алдангъан
44. ве
45. джехеннемге
46. юзь туткъан-къальбни
47. кульге чевире.

IX.

48. Онынъ бакъышы
49. къальбни
50. шубелер къаткъалагъындан темиздей.

X.

51. Онынъ
52. дикъкъатлы назарындан
53. не эйи ниетли фикирлеринъни,
54. не де гъарезли арекетлеринъни
55. гизлеп олурсынъ.

XI.

56. Онынъ бакъышы
57. къальбни
58. эминликке тоздура.

XII.

59. Онынъ бакъышы иле
60. эбедийлик.
61. толгъунлаша.

XIII.

62. Лянетлер
63. шейтаннынъ
64. къудрет чокърагъына
65. джан багъышлайлар.

XIV.

66. Алланынъ инаети
67. о къадар гузель ки,
68. онъа наиль олурсенъ
69. я, пакленирсинъ,
70. я, чирип кетерсинъ,
71. я да,
72. неджиб-у неслинъ чирип тоз олур.


XV.


73. Озюни
74. ашалагъан —
75. юкселир.

XVI.


76. Киббарлыкъ —
77. ашша мелекнинъ
78. аптеси.

XVII.

79. Эйи ишлеринъ ичюн
80. талап этильмез минет —
81. гъарез къальбнинъ
82. энъ алчакъ дуйгъулары
83. бунъа умют беслер.

XVIII.

84. Баш язысы юрекни якъа,
85. Умют —
86. ялдап кете, ве
87. онынъ ритмини боза..
88. Шунда о
89. агъырлаша
90. ве токътай.

XIX.

91. Барлыкъ
92. къаш-козюни ойнатаракъ
93. Умютлеримизни
94. пародиягъа чевире.

XX.

95. Самимийлик
96. кулькюге
97. махкюм этильгендир,
98. чюнки
99 ондан
100. Кунъджилик къоркъа.

XXI.

101. Куньджилик
102. эр даим хаялны
103. къопайчоралыкъта къабаатлай.

XXII.

104. Кийиклешкен Менменлик
105. унутувлар босагъасында
106. ятып къала.

XXIII.

107. Анълав сынъырынынъ
108. артында Терк-и дюньялыкънынъ
109. эпкинлиги къала.

XXIV.

110. Къуванчнынъ багъыры таштан —
111. яныкънынъ къасеветлери
112. оны раатсызлайлар.

XXV.

113. Анъланылмагъан Эфкяр
114. къуванчнынъ
115. чул-чубурларыны кийп юре.

XXVI.

116. Умют
117. хаялны терк этерек
118. Келеджекке олгъан укъукъны
119. кендисине къазангъандыр.

XXVII.

120. Эр Ким
121. бу дюньяга
122 не ичюн кельгенини биле билир:
123. Тек, бунынъ ичюн, о,
124. ораза вакъытында
125. кендисини четен
126. сейир этмелидир.

XXVIII.

127. Алда-къачнынъ тюшкюнлиги
128. Инсаннынъ самимиетле
129. япкъан ишлерине
130. тесир этип оламаз.

XXIX.

131. Инсангъа олгъан ишанч —
132. ольдюре
133. Аллагъа олгъан ишанч —
134. юксельте.

XXX.

135. Инсанлардан афу сорамакъ
136. керекмей.
137. Астейтаннынъ
138. къуллары
139. дертдеш ола билирлерми?

XXXI.

140. Дуйгъудашлыкъ беклеменъиз,
141. озюнъиз дуйгъудаш олунъыз —
142. ве, сиз кендинъизни анъларсыз.

XXXII.

143. Озюнъни анълая бильмек
144. я юксельте
145. я да
146. ольдюре.

XXXIII.

147. Озь-озюнъни анъламакъ —
148. шубеленгенлернинъ
149. къуветине къувет къоша.

XXXIV.

150. Озь-озюнъни анъламакъ ве бильмек
151. зайыфларны эндишесизлик
152. ялысына алып чыкъа ве
153. бибашлыкъкъа етеклей.

XXXV.

154. Бильги
155. доландырыджыларны
156. сахте пейгъамберлерни
157. ве Иляхларны догъура..

XXXVI.

158. Учь джетемен —
159. Тюшкюнлик,
160. Эр шейни бильмек истеги,
161. Баш язысы
162. Инсанны
163. Бильги ёлунда етеклей.

XXXVII.

164. Рухнынъ гъайрыдан догъмасы
165. танъ чыкъынынъ
166. нефеси киби
167. дуюлмадан юзь бере.

XXVIII.

168. Кунь,
169. сабаны иритерек,
170. сонъуны тюшюнмей,
171. ве бунынънен о
172. кенди сонъуны
173. якъынлаштыра.

XXXIX.

174. Гъарыдан догъмакъ
175. муджизесини
176. эльде эткен гедже
177. эбедийликте
178. къалмакъ ичюн иддиа эте.

XL.

179. Этрафтакилерге
акъикъатны
180. сёйлеген дервишлерге
181. дервиш дие бакъмайлар.

XLI.

182. Эксериет сахте пейгъамберни селямлай,
183. чюнки яланджылар
184. башкъаларны алдаяракъ
185. озьлери де алданмакъ истейлер.

XLII.

186. Дерт ёргъунлыкътан дегиль де
187. Алланынъ къудретине
188. инанмаювлардан себеп агъырлаша.

XLIII.

189. Ер юзюнде
190. къаладжакъ
191. сонъки Адам
192. Алланынъ озюдир,
193. чюнки О, оны
194. кендисине бенъзетип
195. яраткъандыр.

XLIV.

196. Умютини джойгъанларгъа
197. шейтан
198. къолтута.

XLV.

199. Аяттан да тез
200. къаркъу сёне.

XLVI.

201. Котеринки рух
202. эксериетинен
203. Чиркин алларны гизлей.

XLVII.

204. Эр бир гуняхкярнынъ
205. тёвбе этмеге
206. акъкъы бар.

XLVIII.

207. Гуняхкярнынъ самимийлиги
208. Алланынъ инаети иле
209. ольченмез.

XLIX.

210. Гуняхкяр тёвбе-истигъфаргъа кельгенде —
211 шейтан агълай.

L.

212. Эрксизликни
213. джинает догъура.

LI.

214. Келеджекни
215. ялынъыз сонъки чызыкъта
216. О, санъа сенинъ ынтылдыгъынъ
217. косьтереджек.

LII.

218. Анам
219.мени беклеяткъаныны
220. манъа
221. айтып етиштиралмадан,
222. 1996 сенеси январь 18-де
223. саба саат 7.18-де
224. къолларым устюнде
225. джан берди.

Булар онынъ эджель тёшеги
Башында язылгъан сонъки сатырлар эди.
Аннам мени
эбедиен
терк этти.
Ве кульренк саба
манъа
акъшам олып корюнди.

Огде исе энди бир шей ёкъ.
Гуняхкярлар
ялынъыз бир шейден —
тёвбе-и истигъфардан
марум этильмедилер.

Багъышла мени анам…
Багъышла…
Фанийлерге — фанийлик,
санъа — менгулик.

18.01. 1996

Рус тилинден
Юнус КЪАНДЫМнынъ
терджимеси.