Чир хьухь

Зун шаир яз хайиди туш дидеди,
Белки адаз зун шаир хьун хуш тушир.
Халкьди ийиз туна кІвалах келледив,
Ам мефтІедив ацІанвай зи, буш тушир!

Аял чІавуз акваз чІуру кІвалахар,
Къелемни чар гъиле кьуниз мажбурна.
Дерин гьуьляй кьурла халкьдин булахар,
Хуьруьз-кІвалаиз, Лезгистандиз машгьурна.

Яваш-яваш хкаж хьунвай яшариз,
Жегьилвили чІугуна зун вичелди.
Шад шиирар багъиш ийиз рушариз,
Хкаж хьана кьилелди, кьве кІвачелди!

КІелунарни, кІвалахар гьар жуьредин,
Авуна за, дуьз инсан хьун паталди.
Сергьятрилай цІар илитІна Куьредин,
«СтІал-Наме» сагьиб хьана кІватІалдин.

Шиирринни акъатна зи ктабар,
«Шииратдин ялавар» заз масан я.
Жуван чІалар хайи халкьдал ихтибар,
Авур шаир, адетдин са инсан я!

Гьикаятдин, лагьайла зи гъилелай,
Заз «Ярагъви ашукь Уьзден» хуш хьана.
«Къисмет гьахъ я» - лугьун за квез куьрелай,
Бахтарикай магьрумбур заз гуж хьана.

Виридакай рахун шартІ туш, кІвалахар
Гзаф хьана, пашманвилер, шадвилер.
Халкьдикай заз хьайи дерин булахар,
Вуч затІ ятІа чирна элдин Садвилер!

Гьар вуч залай алакьнатІа, хъсанбур
Квез тазва за, эй азиз инсанар!
Закай шаир авур ксар – масанбур,
Багъиша заз, кваз хьайитІа нукьсанар!

Сажидин я рахайди куьн мецелай,
Чан багъишиз гьазур я зун Ватандиз!
Багьа ксар авач квелай къецелай,
Чир хьухь, и кар гьар са касдиз хъсандиз!