Ватан хциз рик1ин гьарай, экв, рагъ я,
Зи ивидиз т1урфан канда са к1ус кьван.
Гъурбат чилел ажуз хьайла начагъ яз,
Ватандин нвакь дарман канда са к1ус кьван.
Ватан ч1ал я, ч1ал диде я гьар хциз,
Ч1ал квахьайт1а хер акъатда зи мециз,
Рик1 ц1рада, жедач адан дерт эхиз,
Заз и чилел дуван канда са к1ус кьван.
Жуван багъдин емиш жува нен герек,
Къуншидинни табахда фу жен герек,
Хцин винел Ватандин экв - хъен герек,
Вилик финиз заман канда са к1ус кьван.
Ц1айлапандин гугрумрикай хкатна,
"Лезгинка"дик хуш ритмаяр акатна,
Ватандикай ни лугьуда галатна?
Биц1екдизни гур ван канда са к1ус кьван.
Хва Ватандиз жедайди туш гьич усал,
Ватанни хва к1еви жеда сад - садал,
Ватандин т1вар рекьидамаз кьан патал,
Шагьмарданаз аман канда са к1ус кьван.
Канда са к1ус кьван
© Copyright: Шахмардан Арран, 2015
Свидетельство о публикации №115080802349
Свидетельство о публикации №115080802349
Рецензии