В. Высоцкий на табасаранском

В.ВЫСОЦКИЙ на табасаранском

 

ККУНИР ДАРЗА ( Я НЕ ЛЮБЛЮ)

Ккунир дарза аьхир чIуруб шлу ляхин,
Гьичра дарза уьмриккан бизар вуйир.
Йисан фаслар сабра ккундарзуз аьхин,
Эгер шулдарш апIуз шаду мяълийир.

Ккуниб дарзуз, фурс апIруган ягьсузри,
Шит касдин гьяйранвалихъ хъугърур дарза,
Ва гьацира – йиз гъюнихъан хълигури,
Йиз кагъзар урхру вахтна, ккунир дарза.

Ккуниб дарзуз, гьацIивал ади шлуган
Ва чIюбгъруган ккебгъну айи ихтилат.
Ккундарзуз, кьялхъянди гюлле йивруган,
Машна-маш йивруганра - ккундарзуз зат.

Аьгь апIуз шулдарзухьан гъюдли футнйир,
Шаклувалин камк ва гьюрматнак зазар,
Вая – гьарган къаршуди гъузуз багьнйир,
Вая – рукь либгруган, шюше вуш изагъ.

Тухъ дубхьнайи хъугъ`валра дарзуз кьабул,
Хъугъ`вал ккунир гьаммишан дидихъ тIиркIур.
Аьрхну азу, намус дапIнайган батIул
Ва гьюрматнаъ ирчнайган гафар кIуркIур.

Дюргъну айи хлинццар рякъруган узуз,
Гьавайиди шуладар йиз юкIв чашмиш:
Гуж апIубра, зяифвалра ккундарзуз,
Анжагъ гьяйиф, Христос апIуб хачламиш.

Ккунир дарза, гучI`валин мяхъ кубчIвруган,
Аьгь гьубкIдариз, ккибтган марццирин хатур.
Ккунир дарза, йиз кIваъ фуж-вуш учIвруган,
Хъа иллагьки - дидиъ абтIруган туту.

Кунир дарза сягьнйир уйинбазарин,
Душв`ин мильон кепкиз апIура хирда,-
Белки, гъюзимбу уьмрикк шул жара бин,
Амма узуз даккниб сарун ккун хьидар.




ДУМУ ДЯВДИАН ГЪАФУНДАР   (ОН НЕ ВЕРНУЛСЯ ИЗ БОЯ)

Фу дубхьну а? Вари вуки гьарганси:
Чан гьарганси, зав гьамусра ву жангар,
Яркур, шид, гьава ими айиганси,
Анжагъ Думу му женгнаан гъафундар.

Фунур гьякь вуйш ич гьюжатариъ нивкIсуз,
Читин ву аьгъю апIуз сарун учкан.
Анжагъ гьамус Думу гьуркIрадар узуз,
Думу кьялякъ дуфнадруган женгнаан.

Думу лал шлур, мяъли дюзди хътрипрур вуй,
Думу гьарган улхуйи жарабдикан,
Ахуз гъитурдай, ахсрихъди гъудужвуй,
Анжагъ думу накь гъафундар дявдиан.

Дюн`я ичIи хьубкан дариз ихтилат:
Сабпну гъябкъниз, учу кьюр вуди гъахьиб…
МикIлу йиз цIа кутIубшвубсиб агьвалат
Дубхьна, думу женгнаан кьялякъ дарфи.

Йисирвал`ан гьебгу  нурси хабарсуз,
ГъалатI духьну, гъи ктахьний узкан гафар:
«Зигруб гъибт, дуст!» - анжагъ жаваб вуйи суст…
Думу накь дядиан кьяляхъ гъафундар.

Ухьу  бала-кьазйирихьан уьрхюри,
Ихь гъийихдар – ихь уьмрин гъаравлар ву…
Штун дагграъси, зав ярквраъ атIабггури,
Аркну айи гьарарин ранг жангар ву.

Жилин гъазмайиъ кьюриз йишв гьубкIнайчуз,
Кьюриз вахтра гъябгъюрайчуз сатIиди.
Вари гьамус сариз гъубзну… Хъа узуз
Узу гъузси а, дявдиан дарфиди.




КIАРУ БУШЛАТАР (ЧЁРНЫЕ БУШЛАТЫ)

Кьяляхъ гъузна алдакбар ва аркбанар, -
Мумкин вуйиш мискьалсибкьан хъуркь`вал хьуз!
Хъугъуз ккундиз, му ихь кIару бушлатар,
Себеб шул удубчIву ригъ рябкъюз ухьуз.

Вардин улихь гъапний: «Йихай игитди!»
Чалишмиш шулхьа, лигархьа, фу шулуш…
Фикир гъапIза, папрус бисну жарадин,
Анжагъ гъябкънийш, ригъ фици удубчIвуруш.

Башкъа рота – башкъаб ву суй сапёрин.
Меерган циркларгъян йирфар`ина йиз,
Дав ву финка иливуб йиз дюдниин -
 Гъурккишра, ригъ рябкъюруза йикIайиз.

Далуйиъ нивкIуъ дурурккуз вуй гъайгъу,
Рякъ аьян гъапIган, ккатIахьнийза улар:
Гьеле набалугъ чуру кюкю ригъун
Илбицнай, ригъ удубчIвруб дубхьну хабар.

Урггубдин гьацIаъ ич кьяляхъ а гъубзри,
Алдакбар-аркбанарси, хъуркьувалра.
Кьюб гъяцIли сим хътатIурайир силбари,
Гъилигнийза – гьамус за хьиди ригъра!

Учу хътарди хътабкура рота чIякъри.
Асас вуйиб – дабгънуча душмнин дестег.
Гъит за шлу ригъ харжсузди учвуз рябкъри,
Хъугъза йикIбахъ, ужуб хьуз ичв гележег.





          ТЕПЕ   (ВЫСОТА)

Тепейихъан хъичIихна, чпинуб вуйси,
ЦIа гагь селси, гагьсан тIуркIбариъ гъюра…
Вокзлик буфетдиз диш духьну гъягъруси,
Гъварчди душв`ина гъярача учура.

Ялвигъ гъяйи кIакIназ багахь чвурхури,
ЦIиб дажаргъну, хъана жил`ин дахърайча,
Мушв`ин жилин кьисматар- рякъяр вари
Сабсабдиин духьнайиси узна чап.

Гьуррайин чIигъ абсну гъубзрай ушвариъ,
Учу гюллйир хътIюркъюри айи вахтна.
Урггуб  ражну му тепе гъадабгъури,
Урггуб ражну думу дипнийча хъана.

Хъана гьюжмиз гъягъбахъ адархьа харгну,
Жилар ашси дийигъну а ургури…
Тадабгъурхьа якьин миржибпи ражну -
Тадабгъурхьа ихь жил - ихь тики багъри.

Хъа, белки, дидхъан хъидицну гъягъярхьа?
Вари гъал гьамус гьаддиин алдарки?!
Амма, якьин, мушв`ин саб-сабдигъ гъяхьна
Дюн`яйин рякъярна кьисматар вари.

Вари ихь гъуларна яркврарна шагьрар
Гьаму тепейин кIулиин уч духьна -
Гьаму тепейиин – рякъяр-кьисматар
Вари гъварчди саб-сабдиин алахьна.

ХъичIихна тепейихъан, чпинуб вуйси,
Ялав улубзури думу кIулиин,
КкудучIвури айча, кIул`ин зигнайси,
Ич кьяляхъ ич дустар гъитри жилиин.




    ГИМЙИР (КОРАБЛИ)

Эргвал йивуз дийигъну, гимйир гъягъюр,
Хъана кьяляхъ гъюз, дилигди амсишназ…
Саб гьацI йис гъябгъяйизра, узура гъюр,
Хъана хътаркуз,
Хъана хътаркуз гьацIйисаз.

Вари гъиди, ужудар дустар ктарди,
Хътарди дишагьлийир, вартIан вафалу.
Гъидар айидар варитIан лазимди.
Дарзуз кьисмат,
Я жвувра ихтибарлу.

Анжагъ хъугъуз ккундиз гьаци дарубдихъ -
Гимйир ургуб аьдат вуди гъубзидар.
Гьелбет, гъюрза умудар- дустарихъди…
Мяъли кIурза,
Саб гьацIйисра гъябгъидар.


Табасаран чIалназ илтIикIур
                Эльмира Аьшурбегова