***

 Дамах ая
Лезги халкьдихъ «Лезгинкадин» кьуьл ава,
Акур гьар са инсан гьейран ийидай.
Лезги халкьдихъ Шалбуз дагъдин кьил ава,
Камалдалди аршда девран ийидай.
Лезги халкьдихъ Кас тIвар алай гьуьл ава,
Лепейралди азад сейран ийидай.

Лезги халкьдихъ хьайид я Шарвилияр,
Абурукай боксер Альберт сад я, сад!
Дуьньядин чемпион хьанвай лезгияр,
ВикIегь хицел пара кьадар шад я, шад!
Баркалладин ад кьилеллай дагъвияр,
Им спортдин никIи гъанвай гад я, гад!

Дамах ая боксер хицел, СтIалар!
Арифдарар, пагьливанар бул авай.
Дамах ая чилелни цел, СтIалар!
Гьар са йисахъ берекатдин зул авай.
Шад кьабулиз мугьман атай кIватIалар,
Ачул суфра, хуьрек алай къул авай!

Ингье къе мад шадарнава рикІер чи,
Бакуда ам лайих хьанва къизилдиз.
Заз кІанзвай спортдин генг рекьерни,
Ачух хьана чи стІалви жегьилдиз!
Альберт стха, вал ашукь я Лекьерни,
Шадвал гъайи Лезги халкьдин гуьгьлдиз!
                САЖИДИН