Заз Ватандин руг авай рехъ масан я.
Кьец1ил к1вачер акьадамаз накьвада
Заз чир жезва зун и чилин инсан я,
И руквада рик1из паквал аквада.
Нисин бере авахьдамаз цавай ц1ай,
Хипен ниси хьран фуни акъудна
Ацукьда зун таран к1аник мукьув гвай,
Вил рекьеваз завай хиял къакъудна.
И рекьерин "ирид к1аник" бубайрин
Ивидалди йигар хьанвай ц1ай гала.
И рекьерин "ирид винел" рухайрин
Женг ч1угуниз эвер гузвай "гьай" ала.
И рекьери йифериз пак экв гузва
Вичин багъри яргъа авай дидейрин.
И рекьери рик1ериз пак рехъ гузва
К1ани гада вилив хуьзвай бикейрин.
Кас гьуьлелай кьакьан Шагьдин синерал
Яхъ фида зун и рекьерай, галатдач,
Аран патай лекь элкъвезвай винерал
Пакаман Рагъ тухуда за, йиф тадач.
Ватандин рекьер
© Copyright: Шахмардан Арран, 2015
Свидетельство о публикации №115061808602
Свидетельство о публикации №115061808602
Рецензии